周秀娜 羅霖入宮賣「浴」
近年集中影壇發展的「性感女神」周秀娜，將踩過界接拍無綫明年開拍的重頭劇集《深宮計》，與同是處女拍劇的劉心悠、視后胡定欣齊齊演妃子，當中更有鴛鴦浴戲份。至於年屆51歲的羅霖亦落實接拍該劇演高級宮女，獲安排出浴戲晒「美魔女」身材。
金牌監製梅小青早前回歸無綫擔任製作總監（合拍劇集），即籌備明年開拍的無綫重頭劇《深宮計》。除早前公布的劉心悠、胡定欣及馬浚偉外，亦成功邀得周秀娜（Chrissie）及羅霖加盟，分別飾演妃子及高級宮女。Chrissie與定欣及心悠一齊服侍「皇帝」馬浚偉，因爭寵而掀起連場勾心鬥角，當中更有皇帝與妃子的鴛鴦浴戲份，無綫為此不惜工本於橫店搭建浴池。
馬浚「蟻」冇要求
據知，首次拍香港電視劇的Chrissie將應付連場打戲，幸而她早有功夫底子，相信難不到她。她昨日接受電話訪問談及接拍原因：「因為角色有發揮，對手又新鮮，希望有火花啦。（拍出浴戲？）未收到劇本，咁電視有佢尺度，唔使諗太多，到時要去橫店兩、三個月，香港亦有戲份。（重金禮聘你？）滿意啦，重要係有新嘗試。（想喺頒獎禮分一杯羹？）拍完先啦，依家言之尚早。」
對於能與幾位女神鴛鴦浴，馬浚偉笑指日前收到梅小青的短訊，內容僅寫了「艷福無邊」四字：「咁我都係時候要開放自己。（要求加戲？）加戲就唔只錫，要挑戰電視尺度。我好早已經覺得Chrissie有內涵同修養。（出浴戲想點就點？）如果我真係皇上就可以，我只係馬浚『蟻』，係蟻民，唔可以要求太多，但我都會去操肌。」
羅霖不惜唔見百萬
羅霖繼十多年前《真情》再拍劇演高級宮女，與謝雪心大鬥法。她說：「都掙扎咗好耐，未拍過宮廷戲，又咁耐冇拍過劇。呢套古裝劇要拍六個月，有一個月仲要去橫店取景，成51歲喇！」為拍此劇，羅霖不惜推掉近七位數酬勞，但亦認為值得。她又稱當年拍《真情》時，要於愛情與事業取其一，結果在家人支持下，毅然放棄事業追求幸福，惟最終離婚收場。回復單身的她正準備迎接新戀情，卻又遇上此劇。她說：「今次又面對同一選擇，第一次自己幫自己決定，我揀咗事業，希望有好結果。」她笑言獲梅小青安排出浴戲，好讓她一騷美魔女身材。
另外，Chrissie昨午約五時於友人陪同下到中環行街，見她匆匆往附近街頭取車，發現記者即揮手打招呼。
文：影視組