黃翠如激罕性感 生日賣「壽包」
昨日35歲生日的藝人黃翠如，夥拍羅仲謙現身沙田馬場，擔任東方表行55週年沙田錦標「時尚煲呔賽馬日」的主禮嘉賓，翠如BB身穿低胸粉紅晚裝，激罕晒事業線，連羅仲謙也不禁嘩然，羅仲謙事後笑言乜都睇唔到，唔通擔心老婆楊怡嬲嬲豬？
黃翠如和羅仲謙昨日在沙田馬場出席東方表行55週年沙田錦標「時尚煲呔賽馬日」，與東方表行集團一眾高層，包括主席楊明標博士伉儷、董事總經理楊衍傑伉儷、執行董事蔡國欽、馮廣耀和林慶麟等，齊擔任主禮嘉賓，見證這項城中盛事。向來守身如玉的翠如趁昨日35歲生日，於男友蕭正楠不知情下，以超激低胸裝亮相，手上佩戴價值179萬元伯爵鑽錶，仙氣加貴氣，令人眼前一亮，被笑指生日賣「壽包」？她解釋是朋友給她送大禮：「有個由細識到大嘅設計師朋友話會送份禮物畀我，嚟到10分鐘就見到條裙，之前冇試過，設計師同我講係兄弟就着咗佢，其實個設計師之前台慶都幫我做過衫，所以都好放心，但係設計師都知我不嬲唔係行性感路線，估唔到生日搞啲咁嘅嘢，生日就着一次，之後冇啦！」
拒性感見男友
問她有否影相給男友看？翠如說：「冇，公司咁多嘢睇，冇時間睇我。（生日點慶祝？）劇組特登度假期畀我，今晚同屋企人食飯，男友都喺度，返嚟見吓大佬（男友），最開心係尋日見到曹永廉拎獎。」而蕭正楠前晚在新加坡出席《星和無綫電視大獎2016》頒獎禮得獎後，在台上祝女友生日快樂，之後再在網上傳情：「我努力工作就是想為你準備生日禮物！今天我拿到了。」他送上「我最愛TVB電視男角色獎」給女友，但似乎覺得送獎給女友還不夠，再在自己Instagram上載翠如的雀斑妝相，公開示愛：「生日快樂、我愛雀斑、快高長大。」真係Sweet到暈！對於蕭正楠「愛的告白」，翠如感到甜絲絲，但以感冒為由，表明不會讓男友看其性感裝束，蕭正楠冇眼福了！
努力賺奶粉錢
現場的羅仲謙甫看到翠如即搞笑地瞪大眼睛，「嘩」了一聲，後知反應過激，即推說是搞氣氛，自言乜都冇睇。早前有傳太太楊怡懷孕，他說：「以我所知，我只係努力中，好坦白，結咗婚有小朋友好正常，唔係報道所講。（唔講得怕小器？）唔係，聽日都要返大陸做嘢。（返大陸前造人？）努力中，唔係日日都要造嘅，隨緣，努力做嘢搵錢為家庭。（講到生B秘技？）聽過人哋講話有啲食療影響生仔定女，第一胎想生女，最緊要健康，聽過醫生講有啲食療方法，但未問人，冇時間睇，喺大陸留多一個月，返港先慢慢睇。（度蜜月時造人會快啲有BB？）聽人講係。」
羅仲謙透露楊怡這年來調理好身體，暗示隨時準備做得媽咪，但他自己反而休息不足。現場羅仲謙獲大會送贈價值21萬8千元的H. Moser & Cie.腕錶，他乘機冧老婆說：「未結婚前諗住買手錶畀自己，依家唔想買畀自己，想買畀太太，預咗六位數。」而翠如亦表示會買錶畀自己，但不想男友送錶，原來是想要驚喜禮物，蕭正楠收到未？
東方表行集團執行董事蔡國欽（左起）、香港賽馬會賽馬業務及營運執行總監祁立賢、黃翠如、東方表行集團董事總經理楊衍傑伉儷、東方表行集團主席楊明標博士伉儷、香港賽馬會行政總裁應家柏、羅仲謙、東方表行集團執行董事林慶麟及東方表行集團執行董事馮廣耀為「時尚煲呔賽馬日」祝酒。
文：名人組