吳嘉儀擺家姐款 熱融李旻芳
在無綫劇集《愛．回家之八時入席》中飾演兩姊妹的吳嘉儀（阿七）與李旻芳（Lucy），相信不少觀眾都對她們留下深刻印象，因為她們外貌似到十足，甚至連媽咪睇電視時都會認錯！不過，性格上二人卻南轅北轍，Lucy內斂，阿七則熱情奔放，這對一冷一熱的好姊妹，坐埋一齊會擦出怎樣的火花呢？
阿七：吳嘉儀、Lucy：李旻芳
分飾兩角？幻覺嚟o架啫！
Lucy畢業於2012年第26期無綫電視藝員訓練班，同期畢業生有何廣沛、林泳淘及陳華鑫，而阿七則剛於2015年第28期畢業。Lucy主力擔任《東張西望》外景主持，曾因採訪日本熊本地震災區而鬧出小風波，而阿七則主力拍劇，但眼利的觀眾慢慢發現二人十分相似，成為熱話，其後Lucy更獲邀加入《愛．回家之八時入席》，並飾演阿七的妹妹。兩位首次同場是坐在一輛的士中對話，當時不少觀眾都誤會是一人分飾兩角，令Lucy與阿七都覺得十分搞笑！
阿七：我記得嗰場戲呀！個個都以為係分鏡拍攝，直至我攬住Lucy，大家先知原來係兩個人。
Lucy：係呀！連導演都話喺個螢光幕入面，我哋真係太似樣。
阿七：有次我哋出活動，我經過祥哥（黎耀祥）身邊，佢露出一個好奇怪嘅表情，原來啱啱Lucy先喺佢身邊經過，祥哥覺得好奇怪，點解個女仔啱啱經過又行返過嚟！
Lucy：係呀！又試過有工作人員過嚟同我講活動嘅嘢，但其實佢想搵阿七，連我啲親戚初初都以為我有份拍《愛．回家》，其實嗰個係阿七嚟。
初遇嚇親！好似好熟咁！
阿七與Lucy外貌十足餅印，但性格上卻大不同，由她們第一次見面時的反應便略知一二。
Lucy：第一次見到佢係喺一個慈善活動上，當時有個女仔離遠大聲叫我「Lucy」，好似同我好熟咁，勁熱情跑過嚟，嗰個就係阿七。我覺得佢個人勁快同人熟落，而我就比較「內熱」，哈哈哈，即係內斂加慢熱，佢同我好唔同！
阿七在劇中飾演Lucy的家姐，但現實中的她其實比Lucy細4年，問到哪個較像家姐，阿七即時搶答！
阿七：我似家姐多啲！Lucy畀人感覺好柔弱，而我就比較大家姐啲，見到Lucy會自然想去保護佢。我喺屋企係大家姐，有一個細妹同細佬，所以我好習慣照顧人。最深刻一幕係Lucy嗲我幫佢做嘢，真係好有兩姊妹嘅感覺。
Lucy：我調番轉，喺屋企最細，排行第五，所以可能畀人感覺柔弱少少，但其實我都好堅強(口架)！
劇中阿七飾演助理編導，Lucy則飾演模特兒，阿七表示角色與她們的性格十分配合。
阿七：扮演P.A完全符合我嘅性格，又係成個男仔頭咁，一條牛仔褲走天下，平時我好少化妝，呢個角色都係唔使點化。
Lucy：我平時唔太識嗲人，不過劇情需要我都要發揮小宇宙，將自己嬌嗲嘅一面攞出嚟。
玩蟲跳海！最緊要搏盡！
別看二人外表斯斯文文，一提到工作，她們即異口同聲說出一個字：「搏！」
阿七：我第一次聽到佢個名，係喺演藝訓練班嘅時候，旦哥（鄭丹瑞）同我哋講話有一個師姐拍劇嘅時候幫手做替身，要放啲麵包蟲上身，又要着住白布鞋走過蟲路，當時連特約演員都唔肯做，但Lucy二話不說親身上陣。
Lucy：我都有聽過你嘅事迹，有場戲女主角要拍跳海嘅鏡頭，臨時搵咗你做替身，你都係諗都冇諗就跳落水。
阿七：我本身熟水性，唔怕嘅！最緊要件事可以順利完成。其實我覺得好好彩，曾經有一個女前輩問過我，有人同你咁似樣會唔會覺得好蝕底，但我反而覺得賺咗，因為Lucy好勤力，工作態度又好，有好嘢會計埋落我度，都唔錯(口架)！
擇偶條件？睇星座性格！
工作上，二人都表示不怕辛苦，但講到擇偶條件，阿七就要求多多，相反Lucy就比較冇所謂。
阿七：我有啲要求嘅，起碼要高過我，我有個特別要求，鍾意年尾出世嘅男仔，因為同雙魚座夾，我鍾意山羊同白羊座，但最重要係喺工作範疇上好肯用功。
Lucy：我鍾意男仔沉實啲，唔好太多嘢講，聰明啲嘅，外貌我唔太重視。
問到現時感情生活如何，Lucy支吾以對，怕怕醜醜不願多說，只表示很滿意目前的感情狀況。可能怕Lucy被追問，阿七馬上發揮大家姐本色，玩「自爆」代為擋駕：「我係發展中，對方係幕後人員，未可以公開住，但大家睇劇集片尾，可能會見到佢個名！」
後記：一條褲兩份着
受訪當日，阿七與Lucy不約而同選着藍色連身裙，難怪一見面已哈哈大笑，大叫心有靈犀！當一個拍單人照時，另一個就幫對方影花絮，又互相提點小心走光，默契十足親姊妹一樣。當阿七接受個人訪問時，因為連身裙太短，Lucy即時把着住的短褲借給她，認真姊妹情深。
文：盧嘉靜
場地：Mioxpace
化妝：Irischan（Lucy）
服裝：ChicTag（Lucy）、Toutacoup（阿七）