鄭文雅恭喜又拍拖 小方嚇窒：超蓮係好朋友

小方近日被指與鄧麗欣（Stephy）的情傷已愈，秘密與超蓮拍拖，早前更一起到尼泊爾探訪，被拍到一支水兩份飲，小方更為超蓮按摩表現細心。昨日小方與鄭文雅為「港鐵競步賽」任開步禮嘉賓，小方終於首度為戀情作回應，而最抵死是鄭文雅一見到小方就立刻恭賀他：「恭喜你又拍拖呀！係好事嚟！」小方被殺個措手不及，只得尷尬說：「嚇死我。」

鬼仔性格惹誤會

小方接受訪問時大家齊聲恭喜他，他連聲說：「都話唔係囉，係好朋友，一齊去尼泊爾探訪係做大使。」對被拍到兩人一支水兩份飲，小方則言：「係兩支水嚟。（幫超蓮按頸？）我都有睇番啲片，唔覺得動作好親密，我假假地都去過美國留學一年，可能鬼仔性格啦，係Open得滯啩，引起大家誤會要收斂下。」對於被指帶超蓮去一班男性朋友聚會，小方繼續否認：「唔係，有咁報道過咩？」小方又大讚超蓮有愛心，知他去尼泊爾探訪，主動話想去：「好多時外表係睇唔出佢捱唔捱得苦，其實今次行程都好辛苦，係住民宿、鐵皮屋，有啲地方連洗手間都冇，要喺郊外解決，不過辛苦先至會有體會。」

何超蓮	小方為「港鐵競步賽」任開步禮嘉賓。

激讚超蓮好女仔

提到可有發展機會，小方說：「依家冇呀。（即係遲啲有？）遲啲先講。」小方又繼續對超蓮讚不絕口：「我都講佢係一個好女仔，好有愛心、好上進，知佢仲準備考碩士。咁交朋友梗係搵一個好嘅交，唔會搵啲唔好嘅做朋友。」小方又不避忌坦言，和超蓮返港仍有見面，「尋日先見完，朋友唔會因為啲報道唔見面。（你哋係咪地下情？）都話係朋友，冇需要去避唔見面。」問到怕不怕Stephy看到報道亂諗？小方說：「你要問佢啦，我冇得假設咁多。」他又指不知Stephy在台灣慶生，但有獻上祝福，「乜佢去咗台灣咩，我唔知喎。（係咪簡單講句Happy Birthday？）唔係㗎，我係好真誠咁Say Happy Birthday，唔簡單㗎。」

文：音樂組