秋官心痛 讚個女諗通咗

欣宜前晚在《女神有問題演唱會2016》落力演出，觀眾之一的父親鄭少秋讚女兒有進步：「幾好呀！好努力，表現又穩定，比起以前有經驗咗，所以畀佢88分！仲有12分係等佢有進步空間。（睇到女兒邊方面進步？）搵到自己方向，表現更有信心，又多咗自己嘅歌，成個表現比以前唔同晒！（有冇留意欣宜講跪地求前男友唔好走嗰件事？）冇囉！我都唔知佢講邊個，聽完都唔舒服！正因為咁，所以咪有『女神』出嚟囉！個人成熟咗亦諗通咗。」