利嘉兒獲法國鞋王簽名鞋 炒價10萬
有「法國鞋王」之稱的Christian Louboutin秘密來港，超級粉絲利嘉兒連續兩日喜獲邀請會偶像，更獲對方於鞋上簽名，她揚言偶像簽名的鞋在網上炒到10萬都有，但她視為最珍貴禮物，無價之寶決不炒賣！
Christian Louboutin低調來港為其最新推出的唇膏與香水系列宣傳，一直是忠實粉絲的利嘉兒前晚獲邀請出席VIP私人聚會，昨日又獲邀出席酒會。利嘉兒透露追捧Louboutin已達12年：「屋企有成百對佢嘅鞋，最貴嗰對六萬幾蚊，今次第一次見Louboutin，佢喺聚會上分享成功之道，嘉賓亦可隨意問問題，真人好nice，一啲架子都冇，又風趣。」
蔡一鳳開口約大師
Louboutin今次更抽出幾位VIP，在她們提供的鞋上簽名，利嘉兒是其中一位幸運兒，她開心地說：「佢好少幫人簽名，就算訂造佢嘅鞋幾萬蚊一對，佢都唔會簽名，所以佢嘅簽名好難得，喺外國網有佢簽名嘅鞋炒到十萬八萬一對，咁我當然唔會攞嚟炒，係我最珍貴嘅禮物，無價之寶！」利嘉兒將收藏的鞋子視為藝術品，很多都未穿過：「我間中攞出嚟睇吓都好開心，當係欣賞一件藝術品咁樣。」
昨日出席酒會的還有名媛楊張新悅、蔡一鳳、模特兒倪晨曦、著名形象指導郭慶彬等。蔡一鳳亦是瘋狂粉絲，透露剛剛一口氣買了廿多對鞋，她說：「好開心有機會見到佢，同佢傾偈，真係好鍾意佢嘅鞋，啱啱先買咗廿幾對，我同佢講我巴黎間店就開，到時開幕想邀請佢過去，佢答應咗話都想去睇吓。」
楊張新悅鍾情幼跟
楊張新悅透露最愛對方設計的幼跟鞋，問家中是否有很多鞋履？她笑言：「我覺得唔算多，但老公就話好多，我全屋都只係得30對鞋，我啲鞋唔會唔着，因為試過着住對名牌鞋去ball，點知成對鞋嘅膠甩咗，就係因為太耐冇着，所以買咗就要成日着。」倪晨曦自言是理性消費者，家中約有50對鞋。
文：名人組