張秀文心形胸激盪 坤坤標汗亂噏：平底鑊！
無綫咪神張秀文昨日力谷4吋事業線出席活動，令同場的吳業坤不敢正視。坤坤直指秀文的打扮令他思想及行為均受影響，緊張到流晒汗，爆笑非常！
吳業坤與張秀文等昨日出席「世界雞蛋日繽紛嘉年華2016」活動，穿Deep V貼身裙的秀文谷心形胸騷半球，玩拋波遊戲時胸前蕩漾，令拍檔坤坤不敢正視，同場穿露臍裝的唐詩詠及露肩上陣的梁嘉琪見狀亦忍不住取笑他，場面惹笑。
事後坤坤被問到視線方向？他緊張標汗愈講愈亂：「煎Pan囉！你（秀文）唔係煎Pan，係平底鑊……」搞到秀文要為他打圓場：「咁圓底鑊啦！」坤坤又謂：「我思想受影響，行為都亂晒，亂掟蛋，依家就係咁抹汗。（頭先詩詠寸你？）佢提醒我要望觀眾，唔好有不必要誤會出現。」談到日前打風期間到網吧打機，他自認玩得忘形，不知被攝入鏡頭，又笑言未有被認出集郵。而秀文指裙身夠緊及好Fit，不擔心走光。
詩詠煩躁洪永城自動消失
另外，詩詠透露近日減少進食肉類，大大減低煩躁機會，問到煩躁日子是否找男友洪永城出氣？她笑說：「好少，係每月有幾日唔方便日子，佢係唔會搞我！Feel到唔妥就會自動失蹤。（叫佢幫你買女性用品？）唔會，唔可以叫男仔買呢啲嘢。咁有時控制唔到情緒，我自己係知，都會識做嘅。」
文：影視組