田蕊妮喵招御夫
人氣視后田蕊妮（阿田）形象入屋，除了深入觀眾心外，亦有獨門「喵喵」御夫術箍實老公杜汶澤，但她同時大爆與老公存在「分歧」，又明言不想與對方合作：「因為關係上嘅枷鎖，除非角色真係好啱我，如果佢搵到第二個幫手，我免得就免！」
第一招：難以觸摸 喜怒不形於色
視后田蕊妮近期於無綫劇《巨輪II》及台慶劇《來自喵喵星的妳》分別飾演硬淨合伙人及萌爆喵星人。阿田演過的角色都合乎其亦剛亦柔的性格，她亦自爆對老公杜汶澤使出的御夫術同樣「剛柔並重」，難怪兩公婆日益恩愛，不時於網上耍花槍。
提到日前獲老公搞派對及送名錶慶生，阿田即流露冧爆表情大讚老公浪漫，但卻笑言自己要像貓一樣不形於色，令老公難以捉摸：「佢都好浪漫，相當留意我。可能見我拍劇好辛苦，好想做啲嘢去氹我開心。佢都係想我開心，但唔通我開口話其實我好happy？我要好似貓咁對佢，就算鍾意都表現出『其實我……唔係好……鍾意(口架)咋』。」家有愛貓MoMo的阿田果然「近朱者赤」，實行收服老公成為其專屬「貓奴」。
笑老公似有強迫症
對於早前被老公搞笑於網上留言叮囑她約會要守時，結果被她霸氣回覆叫他「慳番」啖氣。阿田對此即由小女人mode「變臉」做「女強人」，堅持自己為人準時，更大爆夫妻間存在「分歧」：「我咁講因為我都冇唔守時。（係佢唔守時？）係，佢永遠早到！佢好恐怖(口架)！成日早到一個鐘，最少都早15分鐘，佢唔守時，我就準時。好似你約我七點，但要人哋六點九到，咁你應該約我六點九，係咪先？我成日都話佢隻錶嘅秒針同我唔同，大家觀念又唔同。」
第二招：避免爭執 婚後從未合作
阿田續爆老公經常「畀說話自己聽」：「佢無論有冇約人，都好似有少少強迫症，佢係要嗰個時間做嗰樣嘢就要做。（佢做唔到會好忟？）佢忟我！因為我守時。有時約人七點食飯，佢四點就準備好，五點就喺我身邊行嚟行去。（畀說話你聽？）佢坐我身邊睇錶，係咁報時畀我聽。（夫妻相處似一啖砂糖一啖屎？）OK啦，大家觀念唔同啫！」她又直言會盡量避免夫妻檔合作，以免節外生枝：「如果佢需要我幫手，都會考慮吓。因為關係上嘅枷鎖，始終兩公婆，除非角色真係好啱我，如果佢搵到第二個幫手，我免得就免，費事鬧交。（驚人講閒話？）係，都唔好啦！雖然我知我哋一齊做一樣嘢，件事可能會好，過程唔會鬧交嘅……到時先算。睇吓呢一日會唔會出現，畢竟我哋結婚後都冇一齊做過嘢。」
第三招：尊重自己 工作唔交行貨
問到於公仔箱劇接劇，會否產生野心涉獵電影？阿田坦言演戲是個人興趣，有得演就得：「我有拍，未出街啫！（抽到時間拍戲？）抽到，大家有個迷思就係TVB演員好難度期，其實唔係(口架)！我冇分電視定電影，都係演戲，呢個係我興趣！你需要我，我咪嚟，唔使太複雜。」
今年主演台慶劇《來自喵喵星的妳》的阿田再與拍檔胡定欣力爭視后之位，她直言抱平常心，但強調自己「超額完成」：「諗嚟都多餘，獎項同收視一樣，受太多因素影響。演員只需要控制手上角色，諗諗有冇尊重觀眾同自己嘅職業！睇番轉頭，覺得自己做嘅係交功課以上嘅，我唔係一個只想交功課嘅人，演戲過程都係唔放過自己。如果唔係，我都唔知點解要返嚟演戲！所以喺我控制範圍外嘅事，我唔會諗。」
阿田剖白拍喊戲拍到心力交瘁，但事後見到成果又相當滿足：「演戲就算喊嘅一滴眼淚，都係嚟自內心，一定係劇情Touch到自己先喊得出。我唔會同你講講吓嘢突然跌眼淚，如果有一日去到咁，你真係要帶我去睇醫生。其實有時都會諗做咩要咁辛苦？心情要咁起伏？問自己呢啲咩生活嚟(口架)？但當演完後諗番件事，其實嗰場戲我演得幾好，好似坐完過山車咁。到作品見街有觀眾讚賞，我又覺得好開心，嗰吓自我實現令我好開心！」
文：影視組
攝：司徒國榮