陳豪拖老婆趕旅行 打風打唔甩
昨日颱風海馬襲港，無綫多位藝人包括黎耀祥與王浩信等原本昨日出發新加坡參加頒獎禮，但要臨時轉Plan提早於前晚出發，搞到浩信掉低「成屋女人」勁擔心！至於陳豪亦巧合地與太太陳茵媺拖手上機，風雨不改恩愛旅行。相比歌手欣宜就冇咁好彩，原定昨晚舉行的個唱頭場被迫取消兼延期，宣布時還哽咽致歉。
黎耀祥、陳展鵬、王浩信、李施嬅及黃智雯前晚現身機場，出發到新加坡出席周六舉行的《星和無綫電視大獎2016》頒獎禮。大隊原定昨日出發，但因颱風關係要提早起程，眾星都表示打亂計劃，要臨急臨忙趕到機場。黃智雯與李施嬅表示出發前要放低手頭工作等通知，講到頒獎禮戰衣，施嬅表示晚裝較緊身，故不敢亂吃美食，智雯則表示露少少性感，是未着過、走高貴路線的款式，她又自爆帶定泳衣及運動衫，邀施嬅一起做運動。
王浩信擔心成屋女人
而王浩信直言打風影響他拍攝劇集《不懂撒嬌的女人》的進度，加上要多留新加坡一天，擔心愛妻陳自瑤與女兒：「我成屋女人呀！而且今次真係大風，好擔心佢哋！（趁機休息吓？）會試吓美食，要搵地膽帶路。」陳展鵬則表示改期反而更舒服：「依家開緊《同盟》，原本由09開到06再上機，但因為要等飛就變相有休息時間。」
至於陳豪與太太陳茵媺（Aimee）巧合地在同時段現身機場入閘，一度被以為同樣趕赴頒獎禮，但原來兩人風雨不改的是放下家中三位小朋友出發去旅行，還甜蜜拖手大晒恩愛！近期深居簡出的Aimee戴帽及黑超，見她似乎尚未收身成功，發現記者後更變身「怕醜草」頭耷耷，面對提問只笑而不答。
此外，擔任司儀的鄭裕玲（嘟嘟）、組合農夫的C君與陸永昨日在當地綵排，合照時被要求「影得勁啲」，農夫即搞笑地作狀將手放在嘟嘟胸前，嘟嘟即打了陸永個頭數下，場面爆笑！嘟嘟直言因趕搭凌晨機而相當不習慣：「好攰！好似等咗好耐咁，瞓得一陣，個人浮浮地。」
文：影視組