陸漢洋天生車手 賽道追夢
最近與藝人苟芸慧傳緋聞的錫礦大王後人陸漢洋，19歲時無法實現的賽車手夢想，終在37歲時圓夢。遲了18載兼兩度遇上意外，亦無礙他在賽車場上飛馳，並成為首位參加「法國利曼24小時耐力賽」的華人車手。對於與苟芸慧的戀聞，他承認雙方傾得埋，似乎已Ready在愛情路上踩油！
現年43歲的名人賽車手陸漢洋（William、原名陸恭和），2010年開始賽車生涯，更是首位出戰「法國利曼24小時耐力賽」中「利曼短途世界盃」組別的華人，為港爭光！近期他與藝人苟芸慧傳緋聞，對此他不願多談，但不忘大讚苟姑娘：「佢係一個好女仔，好健談，大家都鍾意賽車，有共同話題，傾得埋。（發展機會？）世事無絕對，但我依家專注賽車。」
難過做生意
瘋狂熱愛賽車的William，16歲已急不及待在加拿大考車牌，19歲首次參加賽道開放日，令他發現當賽車手的可能性：「賽道開放日可以攞架車喺賽車場上盡情咁開，仲有老師教你，我去咗一、兩次發覺好鍾意，19歲就偷偷去考賽車牌，教官覺得我好有潛質，問我有冇興趣做賽車手，但家人唔支持，加上資金出問題，所以放棄咗。」
相隔18年，37歲的William重回起點，追逐19歲的夢想！2009年，他到珠海試玩賽車，並於2012年成為職業車手，他笑言做賽車手比做生意更難：「要做出成績先有人簽你，要有車隊車廠品牌同贊助商，其實係一門生意，反正都係投資，點解唔投資喺自己嘅技術上？」
撞車冇陰影
賽車屬高危運動，William亦經歷過兩次意外，但反而更肯定自己是賽車料子：「2013年喺韓國七車連環相撞，我架車好似波子咁撞嚟撞去；另一次喺泰國比賽，試車時有個配件出問題，當時車速去到180公里，距離胎牆大約200米，我只係驚咗零點幾秒，就將架車向前撞，咁係最卸力。一般人撞完車會有陰影要抖抖，但第二日試車，我嘅車速仲快過之前。」他坦言由於很多親人已離世，加上未婚沒有顧慮，在賽車場上壓力較小：「我太鍾意賽車，仲有力點解唔做，唔做會後悔，如果我將來有小朋友，百分百會栽培佢賽車！」
文：名人組