張繼聰夾爆波 「小聰聰」受衝擊

張繼聰掩着「小聰聰」露出痛苦表情。

黃宗澤、張繼聰、蕭正楠和黃翠如等昨日到將軍澳電視廣播城，出席無綫台慶劇《幕後玩家》「型『爆』登場」記者會。一眾演員以chok爆重金屬造型示人。翠如以catwalk形式出場時，男友蕭正楠即阻住女友，搞到翠如要撥開男友才能企中間位置，公然耍花槍。之後眾人大玩夾爆氣球遊戲，其中一個氣球綁在張繼聰的下體前，爆波時他直呼受衝擊：「真係會彈到！」

蕭正楠要翠如日日報到

昨晨才拍畢新劇《我瞞結婚了》的翠如表示，活動後要趕抵泰國拍兩星期《使徒行者2》外景。提到當地因泰王逝世而政局不穩，她表示會與工作人員互相照應，亦會跟隨當地民眾着沉色衣服。問蕭正楠會否擔心？他即叫女友不要周圍走：「早啲返酒店讀劇本。」並笑指翠如若非每日致電報平安，會立刻飛到泰國找她。

劉佩玥捉實張繼聰，鄧佩儀則負責幫手整爆氣球。	一臉驚青的黃宗澤拿着氣球，任由陳煒用臀部壓爆。	蕭正楠與黃翠如公然耍花槍，認真冤氣。

張繼聰於新劇有連場咀戲，問到會否讓老婆謝安琪收看？他即指老婆看了宣傳片後大讚好睇：「佢會check住我，睇吓啲漏洞，會問我點解做得唔好，又或者點解咁投入。」並指老婆讚黃宗澤的演出「幾charm」，問他有否呷醋？張繼聰笑說：「冇！老婆雖然一時好厭惡我，都一時好愛我嘅。」

文：影視組