呂晶晶北上置業做包租婆

轉型扮特工 打功夫上癮

亞姐出身的呂晶晶，多演出專業人士，想不到近日在劇集《隱世者們》中，拋下斯文溫柔一面，飾演冷酷特工，令人眼前一亮。力求完美的她，事前苦練四個月學功夫，想不到竟打上癮，即使完成拍攝後，仍堅持學功夫。

「喺《隱世者們》入面我做一個冷酷女特工，個角色係需要打，需要同罪犯搏鬥，拍打戲嗰陣就辛苦啲。一知道要接呢部戲，都進行咗一個四個月嘅特訓，我之前冇任何動作基礎，所以特登去學，自己都學咗泰拳一段日子。其實第一次拍動作劇都有好多蝦碌，成日打到瘀，不過武術指導好嚴格，所以唔會多讚，剪出嚟嗰陣話唔差咁囉！我都少少安慰，個角色冇替身要自己真打，睇Playback都OK，自己都勉強收貨。希望下次可以喺電影做打女，雖然辛苦，但當你打得好出到嚟效果好，個滿足感好大，原來真係會上癮。完咗呢個劇其實都有搵師傅繼續學，Keep住打泰拳同學基本功夫。今次喺《隱》劇我好開心可以同宣萱、吳啟華同陶大宇合作，除咗宣萱，我同吳啟華、陶大宇都唔係第一次合作，同吳啟華已經係第三次合作，所以做佢手下好有默契，唔需要再溝通交流，已經一嚟就係o架喇！」

於《隱》劇中，呂晶晶化身女特工。	雖然感情冇着落，但呂晶晶有不少物業在手，夠晒安全感。	圖為呂晶晶。

拒做是非精 學戲演反派

呂晶晶坦言不愛負面新聞，只希望大家留意其工作上的表現，更揚言希望一改形象，做反派！她又自爆私下是個宅女，在家中陪伴家人。

「我唔太鍾意講人哋是非，亦唔太鍾意觀眾關注我係因為花邊新聞，我鍾意大家留意我嘅角色，如果係認同我嘅，會覺得我係一個專業嘅演員，而唔係鍾意搞好多新聞嘅人。其實私底下嘅呂晶晶係一個宅女，鍾意做好多一個人做嘅嘢，會一個人睇戲食飯，之前鍾意成班人出去食飯玩，依家就鍾意留多啲時間畀屋企人，陪下媽咪放下狗，自己又可以跑步同做瑜伽。因為對演戲嘅熱愛，所以仲留喺呢個圈咁長時間，我之前跟黃秋生學戲，因為我唔係咩專業嘅演藝出身，所以喺拍嘅中途跟前輩學習，之後又去上堂，所以依家對演戲都有概念。以前我好少做反派，壞女人、好有機心嘅女人我好少做，所以都想做一啲壞少少嘅角色，乜都想試。」

呂晶晶（右起）有幸與好戲之人吳啟華及宣萱合作。	呂晶晶揚言想挑戰飾演壞女人的角色。	圖為呂晶晶。

做生意咪搞 一味買磚頭

單身多年的呂晶晶，坦言感情隨緣，連媽媽催婚多次都已變成半放棄狀態。雖然感情冇着落，但呂晶晶多年投資有道，在內地及香港置業，更成為包租婆收租致富，算是圈中小富婆。

「搵男朋友隨緣，都咁大個人又拍過幾次拖，自己都有個標準去搵未來老公，首先大家思想上要溝通到，要心地善良同孝順屋企人。屋企人已經心急咗好耐，我媽咪其實已經係半放棄狀態，呢兩年佢都覺得我大個，佢知我要乜，覺得催係冇用嘅，要睇緣分。其實我幾年前已經置咗業放租，都想再買大間啲，之前成日返內地拍戲，賺咗啲錢會喺內地買樓，屋企喺杭州，所以有喺嗰度買樓，買咗幾間細細間，買唔起太大呀，自己屋企嗰間咪千呎囉！我淨係識買樓，有啲係同媽咪一齊買，佢好識投資。做生意？我對數字冇咩概念，有諗過同朋友開餐廳，但都係算啦！」

文：林倩怡

攝：張福宏

場地：Schnee German Restaurant

髮型：David Ko＠HH Salon