42歲徐濠縈趕尾班車追B
昨日徐濠縈（阿徐）出席彩妝活動時，指有四名子女的碧咸嫂（Victoria Beckham）既能兼顧事業與家庭，是她的倣效偶像，已42歲的阿徐表示老公陳奕迅（Eason）下星期便完成為期兩年的巡唱，之後會落力造人，她更會減少跑步作配合，為求趕及尾班車添丁。
徐濠縈、女星吳千語、名模周汶錡、鍾浠文昨日出席Victoria Beckham與護膚品牌Estée Lauder推出限量彩妝系列活動，阿徐表示十分欣賞「偶像」碧咸嫂，既擁有達國際級的時裝品牌，又兼顧到家中四個小朋友。有意添丁的她會否倣效碧咸嫂多生幾個？阿徐直認恨生B：「但個天未畀到我，我努力中，要趕尾班車，我跑得太勁要減少跑步。Eason做咗兩年巡唱，下星期佢喺北京做埋最後一站，就有時間可以試吓（造人），我年紀唔細，要努力！」
求秘方學煲補湯
阿徐更自爆有向朋友請教生仔秘方：「有啲朋友同我講睇中醫，但我唔想有太大壓力，壓力愈大愈唔畀你，個人要輕鬆啲，早啲瞓，食得健康啲。（煲補品畀Eason?）啲人話煲花膠海參湯，但佢都未有時間，要得閒先得。（下星期做完巡唱就有時間？）我都等咗好耐，我個女都12歲，今年係一個循環，我好想再生隻馬騮，因為覺得聰明可愛、易教得嚟又有少少百厭，奈何老公太忙！」今年的馬拉松賽事，她只會跑半馬及擔任領跑員，跑得較輕鬆。提到有傳她與何超儀鬧不和，對方不肯聽她的電話，要Eason做和事老上門道歉，阿徐強調沒有此事，兩人常以微信聯絡，反叫記者問何超儀回應。
鍾浠文性感亮相
而周汶錡因兒子出牙發燒病倒，她被傳染抱恙現身：「佢第一次發燒，老公、媽咪都唔喺香港，唔知點算，本打算送佢去醫院，朋友話發燒未到39度都仲OK，我畀咗啲退燒藥佢食，之後就退咗燒。所以做媽咪要處變不驚，睇緊啲、但又唔可以太緊張。」有傳無綫會為林峯開工作室，自由度更大？千語說：「我知佢好想突破試新嘢，我會支持佢，人唔可以成日重複。」但是男友若開工作室，她不會過檔，工作上分開好一點。而鍾浠文剛出席完在意大利舉行的內衣騷，繼續性感亮相，十分吸睛。
文：名人組