欣宜處女騷唔正經

欣宜將於本月21及22日在九展Star Hall舉行《女神有問題》演唱會，演出於8月底才落實，只有兩個月準備，時間非常緊迫：「我同公司講開騷絕對冇問題，唯一要求就係開騷嗰個月唔好排我做其他工作，我真係需要好專注去做運動、排舞、練歌。我係緊張大師，唔畀足夠時間怕做得唔好，因為始終係第一次。」

慶幸冇退出

回想入行不經不覺已有8年，欣宜坦言青春全放在這個行業，會用演唱會答謝一直陪伴她成長的歌迷。談及花了8年才實現演唱會夢，她不禁說：「好彩兩年前冇放棄，真係好好彩！諗番起簽依家間唱片公司同經理人公司之前，我真係諗過唔做，離開呢行，好彩大家都冇放棄我！」

一度想放棄唱歌的欣宜，慶幸當年堅持下來，才能圓演唱會夢。	欣宜處女騷唔唱爸爸秋官的歌曲，相信秋官唔會Mind嘅。	自認「緊張大師」的欣宜，每次演出都盡情享受舞台。

唔唱爸爸金曲

落實開騷後，欣宜不停參與製作會議，希望將最想做的事都表達出來：「無論服裝定Part數都好堅持。（想有咩造型？）如果成件事太正經就唔似我，都會有啲得意嘢放落去，係特別嘢，唔係可愛嗰種。」問到可會選唱爸爸秋官的經典歌？她笑說：「又真係冇諗喎！因為Rundown好爆，我相信爹哋，或者媽咪在生，都想見到我係用自己嘅實力去爭取每個機會，唔使靠佢。」至於可想加場，她說：「留番再大啲場館先，今次做得好唔係為今次，係為咗有下一次，當然我都希望上到更大舞台。」

文：音樂組　

攝：吳文聰

場地：Spark Bar & Restaurant

化妝：Samuel@江中平化妝室

髮型：Milk Chan@Xenter

造型：Constance Lee