李佳芯自嘲蠢鈍披着狼皮的羊

宅男女神李佳芯（Ali）憑劇集《律政強人》及早前的《潮流教主》，逐漸洗去壞女人角色的味道。今次在《律》中更要飾演蠢鈍律師，李佳芯笑謂是做回自己：「今次角色係幾蠢嘅，後來有方中信做後盾先慢慢學精，做嘢會有啲踩界。開頭好似做番自己咁，現實我都係個『得個樣』嘅人，啲人以為我成日去玩，其實我係超級宅女。啲人睇我個樣好似好有信心，但實際我係冇乜自信；好似啲人覺得我個樣似小三、狐狸精，但我其實諗嘢好直接，諗到就做，唔識陰謀詭計。」

做定功課唔想衰

李佳芯劇中的角色像小綿羊落入如狼似虎的廖啟智與方中信手中，拍攝前聽到要與兩人合作已感到壓力巨大，她說：「聽到佢哋個名壓力就嚟，但好快就冇，因為自己唔想嘥咗機會，於是集中精神去做功課。不過到出街前又有壓力，聽啲同事話套劇好好睇喎，個個讚到咁就開始有壓力，出街前嗰晚都瞓唔着，好彩一出街就鬆晒。」

李佳芯覺得方中信與廖啟智也是大細路，拍攝相處融洽。

李佳芯的外表充滿殺傷力，但她卻自爆缺乏自信。

大爆智叔愛唱歌

提到與廖啟智與方中信合作，李佳芯直言兩人是大細路：「方中信個樣好似好Cool、好惡，其實佢好易開心、好易唔開心。有時拍到好辛苦，話去佢鍾意間餐廳食嘢，佢又開心番。智叔喺螢幕前好有氣勢，但背後就好鍾意唱歌，佢本身係好熱情嘅人，乜都講。」李佳芯指與前輩合作學懂了相處之道：「你特登問佢哋，佢哋只會搞笑咁答你，但到你認真去做，佢哋就會喺旁邊提你一兩句，呢一兩句會點醒咗你。佢哋睇得好準，好犀利！」

場地：香港九龍東皇冠假日酒店

服裝：Modele de Prudence

文：影視組