關詠荷叫張家輝 立定遺囑

藝人關詠荷昨日在商場出席慈善活動，她表示為了湊女而減少工作：「有啱都會做嘅，做嘢個人靈活啲，唔會有腦退化症 。（叫老公張家輝開公司力捧你？）唔好喇！一陣蝕晒啲錢，又要放時間，個家會散o架，哈哈！佢好似做得幾好，佢做得啦！（好似劉青雲同郭藹明一齊開公司？）唔使啦！開公司就有負擔，佢呃鬼郭藹明咋，有風險咁點，叫張家輝寫遺囑得喇！公司就唔使寫我名，世事好難講嘅。（你都掌握佢嘅財政？）唔係，佢自己處理，叫佢寫張平安紙畀我得喇！不過，我諗佢會寫個女個名囉！」

收老公大禮冧爆

問到老公張家輝送過甚麼大禮給她？關詠荷即冧爆說：「佢個人已經係一份大禮，邊有男人咁勤力去工作，又唔會搞其他嘢，佢又冇乜其他嗜好，淨係鍾意創作，平時喺屋企都係好勤力咁寫劇本。（會唔會覺得張家輝冷落咗你？）早期佢搏殺階段都有，不過依家寫劇本就好好多，佢思想唔喺度啫，個人都喺屋企。」

遠視影響形象

另外，關詠荷最近覺得眼睛易攰，檢查後發現原來一直有遠視問題，她笑說：「以前啲攝影師都問我做乜皺住眉，又黑口黑面，原來因為有遠視睇嘢唔自覺用力，影響咗我嘅形象，依家戴眼鏡睇嘢舒服咗好多，寬容咗好多，哈哈。」她表示暫時沒有老花，眼睛還好。

文：影視組