楊秀惠邪花2.0 乞人憎到笑

楊秀惠繼《鬼》劇扮演姣擒陳豪的「邪花Lolita」後，今次再接再厲，她笑言為了色誘阿Mo，甚至出動「腳板底掃面」攻勢：「我運用Body同腦，不斷諗新方法食咗阿Mo！有場戲直頭伸腳貼住阿Mo塊面掃幾下！（赤腳？）有着絲襪，當時大家拍到好攰，佢好快捉住我腳板試位，之後就正式拍！」又表示有時阿Mo會提示她未夠「猴擒」。她又指劇中要不斷數衰阿田：「有次我要出盡力狂鬧阿田，拍完後搞到佢大嗌『楊秀惠，你好乞人憎呀』，之後我哋就笑唔停。」然而劇中秀惠最終會「洗底」情歸蔣志光，變作對方背後的小女人。