蕭正楠穿越天台嚇到瀨尿
無綫藝人蕭正楠、曹永廉、何廣沛日前於中環為新劇《超時空男臣》拍攝節目巡禮，內容講述三人由明朝穿越到現代，追尋太子妃王君馨的下落。「搞鬼孖寶」蕭正楠與阿廉未埋位時見到彭于晏的電影海報，即時整古做怪擺甫士拍照勁搞笑！訪問時，兩人開波互窒一番，蕭正楠說：「大家今次好認真去拍，見阿廉已經背緊唔知幾時拍嘅對白。」阿廉說：「咁你邊次唔認真？阿廣都好勤力，係你最懶。」蕭正楠反擊：「因為我啲對白已經喺晒心中！」
蕭正楠又透露早前拍攝一場天台戲，取笑阿廉與阿廣嚇到腳軟：「場戲講我哋喺天台邊緣準備返明朝，佢兩個都因為畏高嚇到腳軟，我就唔怕死嘅。」阿廣即還擊：「但係就瀨咗尿！」曹永廉則笑言「去到咁嘅年紀」要珍惜生命：「阿蕭就乜都冇，有乜所謂啫！」蕭正楠說：「頭先好感人嘅，我話我哋兩兄弟一齊跌死冇所謂，但係佢話唔得，屋企有大有細。」曹永廉即抽水：「留番我幫你搞身後事好過啦！」
