吳業坤（坤坤）與黎瑞恩昨晚為節目綵排，有指王卓淇鬧爆龔嘉欣介入她與吳業坤的戀情，對此吳業坤強調要用「認真mode」回應：「自己認識嘅龔嘉欣唔係『小三』同搶人男友嘅人，今次大家都好無辜，我冇同龔嘉欣拍過拖，感覺似屋企人。（有冇同王卓淇聯絡？）冇同另一位（指王卓淇）了解件事，喺網上知佢嘅意思係畀人誤解。」他表示與王卓淇只是同事加朋友的關係，至於為何傳緋聞，他說：「可能以前邀請過佢拍片。（減少同女士接觸？）已經減少咗，我社交平台冇同我同齡嘅女性，淨係得男性。（女仔唔敢同你出街？）都好耐冇約朋友。」至於王卓淇則在社交網呼冤，指受訪時只是談愛情觀，不是鬧龔嘉欣。