何韻詩「集體贊助」紅館騷唔使蝕賺百萬
歌手何韻詩一連四場「一腳踢」紅館演唱會在排除萬難下完成，當初為圓個唱夢本着「蝕住唱」心態開騷，結果絕處逢生，以創先河的「集體贊助」成功自救，唔使蝕本更賺百萬，相信不少歌手心郁郁效法，演唱會製作模式或現一片新景象。
去年底阿詩宣布成功申請10月檔期重返紅館開演唱會後，因其政治立場敏感而成為獨立歌手，雖然她無大公司在背後撐腰，亦無大財團的「水喉」射住，但人窮智生下被她想出「集體贊助」的「求生橋」，多番號召下招攬近300間小商戶贊助「籌旗」開騷。前晚阿詩在個唱尾場透露心底話：「今晚決定心散啲，太專心會失控（爆喊），但講真，好感恩今日可以重返呢個舞台重新出發。」
向恩師致敬
前日是阿詩恩師梅艷芳53歲生忌，阿詩唱《如無意外》後感觸說：「今日係（手指向天），生日快樂！因為呢個人，我踏入咗呢一片咁神奇嘅地方，呢個係我行到第20年嘅地方，畀咗好多好多回憶我，啱啱唱嗰首歌（哽咽），係你離開後我寫嘅，係我對你少少嘅致敬。」台上阿詩亦玩網上直播，特別選唱《絕對》送給昨日牛一的母親。
笑觀眾夠癲
個唱近尾聲時觀眾high爆，阿詩唱到超時，至凌晨12時才結束，被罰款五位數字。她在台上笑說：「集體籌旗OT啦，不如畀個戶口號碼你哋，籌幾多就唱幾耐。」有觀眾叫好，阿詩笑說：「黐線啦，邊有咁癲嘅觀眾？不如你哋留番啲錢買我其他嘢。」據聞今次阿詩搞「集體贊助」開騷，到最後扣除製作成本倒賺百萬，令行內人跌晒眼鏡，不排除「集體贊助」成風，令沒有唱片公司及大贊助商支持，甚至政治立場問題的歌手有生機。
完騷後阿詩接受訪問，問到會否再入紙紅館申請明年開騷？她說：「我希望明哥（黃耀明）快啲開先真，自己就冇必要咁快再搞。（用呢個集體贊助形式？）咁又唔知喎。」
文：音樂組
攝：吳文聰