蘭茜收錨被扯落海斷手指

麻煩女星蘭茜自早前與俄羅斯富豪Egor Tarabasov的婚事臨門撻Q後，連月來不時與友人在地中海出海療情傷，不過近日轉到土耳其歎世界時，樂極生悲發生意外，甚至慘斷手指，情傷未愈便再受傷！

好彩駁得番

據知蘭茜前日事發時，本想嘗試收起船錨，卻被纏住兼扯落水，蘭茜於水中極力掙扎，雖然最終成功游上水，但左手無名指指頭卻被錨割走，幸好友人於甲板找到被割甩的指尖，並將蘭茜送到急症室救治，及時做手術成功駁番！有美國傳媒公開蘭茜於醫院的照片，可見成忽手指頭冇咗，血淋淋，睇相都覺痛！不少粉絲即留言送祝福與安慰，希望蘭茜早日康復！

事後蘭茜分別於社交網Snapchat及Instagram上載短片及照片交代事件，鏡頭影住接受治療後被包到大大舊的左手無名指：「呢個就係我試圖自己起錨嘅後果。」另於照片上留言指險些失去手指，幸最後做手術駁回，不過就指堅係傷得重！

文：外娛組