楊嘉怡決戰偶像郭富城 冇情講！

本地女車手楊嘉怡（Denise）將出戰10月8日及9日首屆於香港舉辦的「2016國際汽聯香港電訊電動方程式賽車錦標賽香港站」，8日將與車手潘德俊、天王郭富城、周柏豪等同場較量。她坦言很仰慕城城的歌藝，並知道他喜歡賽車，期望與他一較高下。問到屆時會否手下留情？她笑言：「梗係唔會，賽道上冇得留情！（會唔會搵城城集郵？）會呀！」而作為女將，Denise精心挑選了粉紅色為她的戰車顏色，她笑言：「我自己鍾意粉紅色，同埋都希望觀眾知道呢架車係女仔揸。」

男車手唔輸得攬炒

男性當道的賽車活動，Denise自信地表示女性的駕車技術絕不遜色，曾有男車手因不願接受技不如她，決定「攬炒」，她說：「有男車手係刻意撞我，畀女人爬頭，佢哋承受唔到呢個壓力。試過有人不斷撞我出去（跑道），情願『攬炒』，都唔想畀我贏。（有冇發生過意外？）我試過翻車，不過好安全咁走番出嚟，冇受傷。」她更以此為動力，努力做到更快圈速，避免留於車群中，以防被撞。

郭富城	楊嘉怡未上戰場已展現出英姿颯颯。	楊嘉怡（中）去年在賽事中捧盃。

賽車活動所費不菲，她坦言是一件「燒錢」玩意，最少都花費七位數字港元，Denise說：「其實買輪胎都用好多錢，因為一條胎都要二千蚊，一場賽事慳嘅話都要換六條胎，換十條、十二條都好平常。又要睇架車嘅損耗，賽後維修都要錢。而且又要帶一隊人去比賽嘅地方去Serve你架車，參加賽事又要交報名費。」幸得不少贊助商支持，讓她可以盡情追夢！

兩乖仔係最大動力

Denise育有兩名分別五歲及八歲的兒子，她說兩名囝囝是她的好夥伴，亦是她努力爭勝的動力：「佢哋成日同我一齊追睇F1賽車，知道我有比賽嗰陣，佢哋會同我講『快啲幫我拎第一返嚟』，真係好sweet！」除了揸得一手好車外，Denise亦有藝術天分，早前她與腕錶品牌合作，攜手設計手錶，為成長希望基金會拍賣籌款。有見反應良好，她再度「添食」，設計第二版。

女車神創紀錄

楊嘉怡於車壇中屢創佳績，2009年參加AGF亞洲方程式國際公開賽，於英雄輪胎盃房車挑戰賽北京站第二回合獲得車手盃第一名。2013年參加韓國釡山Touring Car Series In Asia by IMSP，於N2000組獲得第二名並刷新最快圈速。2014年參加華夏盃大賽，獲得台灣、上海、澳門站冠軍及中港澳台四地女子組總冠軍。2015年成為史上第一位女車手獲得香港汽車會（HKAA）香港房車錦標賽挑戰賽N2000組總冠軍。

文：名人組