麥芷誼做Sales買樽水都慳
影壇新人麥芷誼（Koyi）去年豁出去全裸拍攝電影《同班同學》做女主角，當時更辭去原本售貨員工作，為追夢破釜沉舟。可惜，拍畢此片後，Koyi差不多一年沒戲拍，經濟陷入困境，年中更一度要捱麵包度日，為了不想成為屋企的負擔，早前麥芷誼再次重投Sales行業，於太古城一間店舖內工作，現場所見，她工作十分落力，有客人入內，即落力推銷一番，對貨品的資料如數家珍，十分專業！
自備清水
而當午飯時候，Koyi未有外出午膳，待兩點半下午茶時間一到，才出去吃飯，期間更連買樽裝水的錢都「慳番」，在公司裝滿一杯水拿着去美食廣場，實行慳得一蚊得一蚊！
記者趁她差不多吃完飯時，上前跟她做訪問，她指已任Sales一段時間，她說：「做咗一段日子，始終都要生活，今年年頭開始到年中，經濟都幾拮据，連家用都唔係咁畀到，仲有之前讀大學借咗學費仲還緊，唔想屋企人擔心，所以就做番Sales。」
雖然做番Sales，但Koyi做演員的火並沒有熄滅，之後會再次辭工，投入電影幕後工作，任電影服裝美指助理，非常適合大學修讀時裝設計系的她。Koyi始終最想做演員，希望將來再有演出機會，一展所長。
文：影視袓