薛凱琪魚網裝 撼大圍G-Dragon！

歌手張敬軒、薛凱琪（Fiona）等前晚出席青年音樂會，同場有多個韓國組合包括女團miss A成員霏及內地歌手吉克隽逸，軒仔表示知道很多妹妹觀眾特意來看韓星演出，但她們看到本地歌手演出時，仍會慷慨給予熱烈歡呼聲，他還搞笑稱想帶她們去睇金魚：「佢哋畀我過咗鋪癮，好似做咗韓星咁，所以我要努力練舞！」又笑言改了一個新稱號向韓星介紹自己：「我英文名叫Hins，人哋聽落去好怪，所以我想改個響啲嘅名，叫做David G-Dragon！即係大圍（大衞）G-Dragon！」

高衩誘惑

以一襲紅色長裙盛裝亮相的Fiona，演出時即場脫裙，內裏穿着性感的紅色高衩裝配魚網絲襪，大跳勁舞！問是否想以性感打扮撼韓國女團？她笑說：「我想撼張敬軒！其實因為我對上一次喺紅館唱歌，已經係我自己嘅演唱會，差唔多2年，所以今次想重視一下。（入面着肉色打底？）我哋試過好多版本，有啲驚太賣弄性感，都係適可而止。」

張敬軒勁歌熱舞過韓星癮，仲改新稱號自我介紹。

薛凱琪趷籮演出，極盡誘惑。

提到軒仔要以「大圍G-Dragon」向韓星介紹自己，Fiona即潑冷水：「你哋叫佢得閒同我傾多啲偈啦，佢啲笑話真係好唔好笑，唔好同我鬥！張敬軒，大圍G-Dragon is not funny，你算啦！唱你嘅高音啦！跳舞都可以，但唔好搞Gag喇，聽姐姐講！」

Fiona自認是浪漫的人，喜歡看韓國的愛情劇。問到可想拍韓劇？她說：「都想，但要睇吓語言係咩，如果要我講韓文，我表現唔好嘅，我寧願唔做。」又指沒有特別喜歡的韓國男星，反而想與內地影帝黃渤合作：「佢演戲好自然同有魅力，就算有啲戲冇咁好睇，但齋睇佢都覺得好睇。」

文：音樂組　

攝：張福宏