現年54歲的歌手杜德偉（Alex）正式初為人父，前日（10月2日）太太李曉冰（Ice）順利誕下重6磅多的男B，並取名「AJ」，兩位新任爸媽生開有條癮，揚言會繼續努力「造人」，為AJ多添個弟妹作伴。
Alex日前出席活動已稱太太Ice臨盆在即，昨日Alex果然在微博公布誕下小Baby「AJ」的喜訊，並上載一張手捉愛兒小腳板的溫馨相片，更分享第一眼見到愛兒的心情：「你終於來了，那種感受有如在等一個素未謀面，但卻是至親至愛的人，對你的外貌長相，有太多的想像，但我們終於見面了。」他並對愛兒AJ說：「我要告訴你，你有一個堅強又勇敢的媽媽，生你的時候雖然極痛，但一點都沒有表現出來，接生的醫生和護士小姐們都說是他們見過最有風度的孕母！經歷着的一切，我覺得人父之初體驗實在是奇妙至極！我現在向你宣布，我的小王子派對正式開始！」
昨日Alex接受電話訪問時難掩喜悅說：「囝囝比預產期早咗十日，佢6磅幾重，喺尋日晏晝出世，我有入產房，太太係順產，佢真係好犀利，好快一個鐘就生咗！（你有冇拍片留念？）冇呀，只係影相。（你有冇喊？）爆喊，同太太一齊喊。（囝囝喊聲好大？）佢把聲好靚，好斯文。」Alex稱兒子英文名叫AJ，但未改中文名。問到兒子似他還是太太？他說：「個樣變緊，但見佢食奶時有酒凹，個嘴仔、眼仔好似媽咪，皮膚比較白、好秀氣，仲手長腳長。」
問到可會乘勢再追？Alex笑說：「醫生話太太生得咁順，可以即刻再生第二胎。（太太點睇？）佢梗係話好！（你呢？）我OK，我趕住生多個畀佢玩，等佢兩兄弟或者兩兄妹有個伴。（生開有癮？）係呀！有癮。」他指囝囝吃母乳，每隔數小時便飲一次奶，而他亦會放「產假」一個月，好好照顧太太和BB。
另外，方力申原來已第一時間跟Alex哥哥杜德智探過BB：「BB非常可愛，好多表情，雖然我探BB時佢未擘大眼，但佢就成日嘴擘擘，又打『喊露』，好乖呀！」方力申更贊成兩人趕緊再生多個。而Alex好友葉童表示雖然未探望BB，但已收到Alex傳給她的BB靚相，她會將買禮物給BB的心意，以BB名義做善事為BB添福。
文：音樂組