單立文質康華食便當 遭夾脷報復
羅仲謙與楊怡組成陣容龐大的18人兄弟姐妹團，接新娘時姐妹康華不留神被兄弟單立文「請食屎」，慘變大花臉，而單立文最終被罰用衣夾夾脷及耳珠，雙方總算打成平手！而新郎出動豐厚開門利是降服眾姐妹，抱得美人歸！
羅楊大婚的星級兄弟姐妹團包括吳卓羲、馬國明、單立文、王浩信、唐詩詠及康華等，昨早齊齊抵達酒店「接新娘」。姐妹團準備幾個遊戲挑戰新郎及眾兄弟，先要穿過呼拉圈凌空跳入屋，然後謙謙赤腳踩入冰桶，夾出麻雀「一索」、「南」及3隻「發」，寓意一索得男及發財，隨後兄弟要在尿布上品嘗「便便」，單立文竟眼明手快，將身旁康華粉臉「塞」向尿布，令她頓時靚妝盡毀，非常狼狽。
粉臉秀髮中招
事後康華大方表示「冇嬲」：「都知係玩啫，喜事嚟嘅。本嚟諗住畀兄弟感受吓BB便便嘅味道，我哋咪搵wasabi同baby food等溝咗啲嘢出嚟。（搞到妝同頭髮污糟晒！）我花咗10分鐘清潔，做呢行轉妝都出名快手嘅。（開門利是幾多？）開心，好大封，幾多真係唔重要。」不過原來她與單立文「搏鬥」期間，對方在她手上留下一道小血痕，可算樂極生悲！
吳卓羲及馬國明齊聲指姐妹團非常容易對付，又指兄弟團的「拖字訣」十分湊效，吳卓羲得戚說：「今日啲姐妹較弱，我哋一直拖延時間，佢哋梗係唔想誤吉時。謙謙嘅開門利是又咁大封，一嘢就搞掂佢哋嘞！」馬國明亦笑道：「我哋遲咗上去接新娘，咁佢哋又趕住嫁嘛！哈哈！」
遲到玩拖字訣
唐詩詠不讓眾兄弟「口舌招尤」，反駁說：「佢哋好長氣，一味係咁拖，知我哋趕時間想快啲搞掂，同埋阿怡叫我哋錫住謙謙，唔好整親佢。其實最尾我都有用衣夾大力夾吳卓羲同馬國明呀！（康華好慘！）佢係我哋委任去對付單立文，佢最終遭殃，我哋見到梗係閃啦！」昨晚大會向記者發放接新娘短片，單立文遭姐妹團用衣夾夾脷及耳珠，謙謙則被勒令飛身撞吳卓羲屁股，姐妹團原來亦有大發雌威的時候！
文：影視組