真人騷女星Kim Kardashian前日現身巴黎時裝周睇騷，相隔兩年再被「烏克蘭整蠱王」Vitalii Sediuk睇中，Vitalii趁亂衝上前想一親Kim的招牌巨籮，事敗後被保安鎖頸打到瞓地，相當狼狽！
以巨籮作招牌的Kim前日在巴黎時裝周睇騷，乘座駕離開品牌辦公室到餐廳時，再被「烏克蘭整蠱王」Vitalii Sediuk「伏擊」！Vitalii見到一身透視低胸Look的Kim落車，即從人群中突圍而出，越過記者及保安嘟長嘴衝前，一手攬實Kim的美腿，同時想錫她的招牌巨籮！不過嘴唇都未掂到條裙，他已被Kim的保安Pascal Duvier及助手Stephanie拉走，他跌落地後一度想爬走甩身，卻被保安捉番起身，鎖頸兼壓番落地！被萬千對眼望到實的Vitalii突然怕醜豬，用手掩面、流晒汗兼成條頸紅晒，極度狼狽，不過最終仍被放走。
其實早於2014年時，Kim已同樣在巴黎時裝周被Vitalii整蠱過一次，當時她與老公Kanye West一齊落車，被Vitalii捉住美腿，嚇到花容失色，混亂中更被壓到車邊抖唔到氣。相隔兩年再中招，Kim今次明顯淡定得多，事後立即入紙起訴Vitalii並申請禁制令禁對方埋身，又在Twitter大讚保安猛料，再在Instagram上載半球大特寫，當冇事發生一樣。
至於Vitalii甩身後在Instagram留言，表示為反對Kim隆假籮才搞事：「我鼓勵Kim同其他Kardashian成員為盲目追隨佢哋嘅年輕女粉絲宣揚自然美，我本身只係喺餐廳門外用緊免費Wifi、食雪糕，突然間成班狗仔隊出現，我見到Kim架車，我發誓唔知佢本身會去嗰度，所以我要好快做決定，咁係咪代表就算我唔去搞班名人，佢哋都會自動送上門呀？希望大家有個愉快嘅晚上，我要食埋個雪糕喇！」風騷到爆的他還上載行Catwalk的短片，教模特兒如何像女王般行Catwalk。其實一星期前，他曾在米蘭當街抱起嫩模Gigi Hadid，被對方批（月爭）擊退。
文：外娛組