關智斌揸番支咪做自己
正所謂「休息是為了走更遠的路」，關智斌（Kenny）就深明這個道理，在內地發展最高峰的時期決定放慢腳步，並再次推出新歌，Kenny又自爆初到內地報到的辛酸，由「二打六」捱到「男主角」，故今次決定用音樂演一個「自己」的角色。
關智斌相隔八年再度回歸樂壇，並推出「角色三部曲」，親自演繹在內地多年，由寂寂無聞的《次要角色》，到嶄露頭角的《塑造角色》，以及邁向未來的《終生角色》。首部曲《次要角色》形容一個人若不嘗試溝通，到頭來只能獨自面對生活，此狀態就如Kenny當年毅然獨自北上找機會，學習在新環境中面對大眾和適應難關。Kenny直言當年唱片市道低迷，工作買少見少，出碟計劃更延期，因而感到迷惘：「我唔出碟仲有咩識做呢？嗰時有個導演話有個角色急搵人，問我有冇興趣，做嗰啲搶人女朋友畀人打嘅二世祖，之後又做過道友、蠱惑仔，嗰陣咩都要演。」
內地爆紅 日子唔易過
Kenny笑言在BOYZ時期經常被前呼後擁照顧，故在內地發展初期並不習慣獨自生活，幸獲不少導演賞識。2013年，Kenny在機緣巧合下擔演《追魚傳奇》男主角，結果在內地爆紅成為搶手貨！惟一年拍足四、五部戲，令Kenny心力交瘁：「我試過最長Stay咗喺內地一年半，又試過兩部戲疊住拍，每日一到派通告就好大壓力，如果重疊咗都唔知點算，精神緊張到不得了，嗰年半我做到最後幾個月時，完全唔知做緊咩。」
為了好好休息和爭取時間陪家人，Kenny今年回港休假，更推出三首新歌，希望在「塑造角色」上取得成功後，可以尋找「終生角色」：「呢幾年做過咁多唔同角色，不如今次演一個自己角色！」
Hair：Sing Tam（Pi4.com.hk）
Make up：Elaw Wong@thelook-studio.com
Wareboard：BEAMS@I.T
文：音樂組
攝：劉智源