陳展鵬撻着胡定欣肉麻調情
陳展鵬與胡定欣拍《城寨英雄》拍出真愛！兩人均是率直之人，亦沒特別忌諱，「愛的痕迹」到處皆是，向來被冠以「Cool Man」的陳展鵬，人前人後「硬繃繃」，不過對着定欣即變得溫柔，兩人更不時出招互冧！先有定欣借姊妹過橋去澳門跑步，「剛巧」展鵬正於澳門拍戲，而當定欣在微博向他留下令人有所聯想的留言，展鵬又會極罕地以肉麻留言回應，隔空互擲「冧蛋」，真係旁人睇見都甜到漏！
陳展鵬與胡定欣拍無綫劇《城寨英雄》成為螢幕情侶，更是今年台慶最熱的視帝、視后人馬，現在二人被指撻着，大家都覺得相當登對。其實人前人後、社交網站早已露出不少蛛絲馬迹，二人的一舉一動就連無綫不少幕後工作人員及演員都看在眼裏。單身多年的展鵬以事業為重，避談男女私情，雖曾有不少女藝人嘗試施冧功埋身，但向來「硬繃繃」、性格率直的展鵬全不留情拒絕，加上開工Cool爆鮮與人交談，被幕後工作人員冠以「Cool Man」稱號。
不過，明眼人都看得出，展鵬對定欣的態度零舍不同，平時二人有講有笑，之前拍《城寨英雄》一場咀戲時，事前不用多溝通就一吻即合，甚有默契，在場的工作人員全感受到，暗笑定欣已「軟化」展鵬。至六月底，定欣與前男友陳明道關係陷僵局，當時展鵬與陳山聰正於澳門拍《乘勝狙擊》外景，定欣更秘密與好姊妹胡蓓蔚齊齊跑步跑到澳門，之後當然約埋食飯，定欣明顯借姊妹做煙幕，實情想與展鵬爭取相處機會。
「追我唔使天花龍鳳」
展鵬與定欣在人前相當避忌，每次齊齊出席活動都不會一同離開，日前他倆出席活動時亦前後腳走。愛情成功改變展鵬，甚少上微博留言的他之前不時於網上耍冧功，以他的性格來說，留言可說是超打冷顫級數，除上載咀定欣劇照，又以「女神」稱呼對方外，二人又不時打情罵俏，定欣借劇情發揮留言：「我珍惜同你的每一刻，雖然我們的甜蜜很短暫，但足夠我記一世。」展鵬冧爆回應：「咁就夠？我還有好多絕招未用出來！乜你咁易滿足o架！」肉麻到入心入肺。於新劇《同盟》未開工前，展鵬曾到多地登台，又上載相片借題發揮：「再度重遇，還有更新。」明眼人都知他跟定欣傳情。而定欣都好識做，激讚展鵬，讚他髮型、樣子、衣服都好看，展鵬相當受落。
一對「新戀人」定欣及展鵬昨日齊齊出席新劇《同盟》開鏡活動，提到有指展鵬用「古法」老土招數來追她，定欣甜笑說：「咩叫『古法溝女』？唔覺展鵬追我喎！」言談間又不抗拒，更冧爆說：「係女仔都恨有人追o架啦，但做女仔要有矜持，追我又唔使天花龍鳳嘅，順其自然啦！」問是否與展鵬有緣？她說：「作為拍檔，要對對方有好感先可以投入！」她又稱新劇中與展鵬有很多「埋身肉搏」戲份，問可有機會擦出愛火花？她笑言：「劇入面有！（展鵬有機會？）任何人都有機會，最緊要睇緣分！」
「大家都想我哋一對」
而展鵬則指新聞不是真，問見到定欣可感尷尬？他說：「唔會啦！我都有經驗o架啦！好開心《城寨英雄》渲染力延續到《同盟》，大家都想我哋一對！」有指他為保愛苗而刻意與定欣保持距離，他說：「我性格怪你哋都知o架啦！有時諗嘢就會孤立自己，有時工作就會咁！但我哋關係冇事嘅！」他大爆日前與定欣齊出騷及登台，更指新劇與定欣有親熱戲：「親熱戲係好埋身嘅動作戲，玩柔道。（驚掂到定欣？）唔驚嘅，大家都專業。」
其實定欣之前每段感情都只維持約兩年，之後「愛情租約」期滿，例必搬竇治情傷，不過與陳明道分手後，仍罕有不搬屋，目的是能與同住將軍澳的展鵬更「相近」。
文：影視組