利嘉兒陪老公慶生飛泰人月兩圓
六年前下嫁有米老公Bong的利嘉兒，適逢中秋節老公生日，相約Moiselle老闆陳欽杰夫婦到泰國豪玩豪食，更大讚陳生陳太精明，帶她走訪不少當地時裝設計師的店舖，令她大開眼界，更有意引入當地設計師服裝創業。
DJ利嘉兒（Lily）任職的電台早前關閉，但她卻不急於找尋新工作，暫時專心做少奶奶，抽多點時間陪老公。中秋節當日她與老公Bong及好友陳欽杰夫婦等齊到泰國旅行，適逢老公正日生日，所以一落機就到當地著名中餐廳食飯慶祝，她說：「本來諗住食意大利嘢，但又覺得中秋節食中餐應節啲，間餐廳好出名，去之前一定要Book位，之後再去露天酒吧賞月，天氣好好，去之前仲驚打風飛唔到，今次真係好好彩。（送咩禮物畀老公？）都係電子產品，佢都好追電子嘢。」問到會否送個「人仔」畀老公？她笑言：「Timing唔啱，呢樣嘢冇得強求，順其自然。」
睇中設計引入香港
Lily透露此行要多謝陳生陳太帶路，二人均是識飲識食之人，令她見識不少，當中去了一間法國餐廳，環境優美。她還即場在Facebook玩直播大讚一番：「間餐廳喺個公園入面，落地玻璃被公園包住，喺香港真係搵唔到咁靚嘅地方，啲嘢又好食。泰國物價比香港平好多，我哋唔覺得貴，應該唔使一萬港元。」她又表示除了食，另一重點是shopping：「我哋去睇咗好多家品，同埋買衫，發現泰國好多時裝設計師啲設計都好靚。我買咗唔少，都有諗過係咪喺呢方面可以搞啲生意，將佢引入香港，同埋陳生陳太好熟當地，跟佢哋買嘢一定唔會蝕底。佢哋好精明，知道啲質地好唔好，價錢大概幾多，而且有眼光，一定唔會被人呃。」
文：名人組