N年前傳爭吳卓羲反面楊怡 胡定欣攬實破冰
胡定欣、楊怡、吳卓羲及黎耀祥等，昨日出席洪天明有份投資的公司派對活動，即將成為人妻的楊怡穿透視低胸露背裙亮相，真空上陣的她事業線若隱若現，實行婚前大解放！
定欣、阿怡及卓羲早年合作無綫劇集《大唐雙龍傳》時，曾傳出兩女爭戲份以及為吳卓羲爭風呷醋，台慶時阿怡更被拍得藐爆定欣！事隔多年，三位當事人昨日難得同場，更大方攬到實合照，似乎要以行動粉碎不和傳聞！定欣表示收到阿怡的喜帖，但暫時未知屆時會否到賀：「根本大家就冇不和，陳年嘅傳聞都係笑吓算啦！（去唔去飲先？）到時應該開緊劇，我都一直同劇組度緊期！」楊怡亦笑說：「其實咁多年嚟大家都冇做過啲不和嘅事，係有次傳媒Cap咗張相話我睥定欣，但真係冇咁嘅事，我仲有請定欣飲添！」
差啲爆響口通水
活動上，阿怡與卓羲齊齊受訪，自爆險些向擔任兄弟的卓羲通水：「差啲講咗畀佢聽姊妹諗住玩乜！10月2日結婚，但10月1日有工作我都照做，一邊工作一邊籌備婚禮囉！」
至於田蕊妮在新劇《巨輪II》演技獲網民激讚，絕對是再封視后之作，定欣說：「依家觀眾要求高，佢有咁出色嘅演出，對觀眾嚟講係開心事。（對你構成壓力？）冇，之前都講大家惺惺相惜，咁先會百花齊放！」
文：影視組