曹思詩蜜桃臀姣精武器

無綫新人曹思詩樣貌似足唐詩詠，自封絕不黐身好女友，畀足空間另一半！擁C Cup身材及天生「蜜桃臀」的她，身材凹凸有致，自爆全靠狂做「推胸」健身及高溫瑜伽。熱愛演戲的她又搞笑自爆恨演「姣精」：「我想演壞女人、小三、情婦嗰種勾引人嘅角色！」

有「翻版唐詩詠」之稱的無綫藝員曹思詩（CC），曾主持節目《山系女行Yama Girl》，近年亦開始拍劇。CC無論眉眼及笑容均酷似被封「絕世好女友」的唐詩詠，她笑言渴望與對方演姊妹：「我覺得少少似，但愈大愈唔似，不過冇所謂，因為佢係個靚女，好想有導演搵我哋做姊妹！」她又自認獨立，拒做黐身女友：「我鍾意男仔有上進心，專注事業，一星期見一日都OK，我唔係貼身膏藥型女仔！不過同我一齊就要全心Focus喺我身上，大家相處時間已經咁少，唔好掛住玩電話。」

推胸健身保上圍

愛做高溫瑜伽減肥的CC，天生擁「蜜桃臀」及C Cup上圍，笑言為怕瘦身兼瘦胸而狂做「推胸」健身力保身材，放假更會游水及衝浪。看似運動全能的她首次挑戰絲帶舞，結果頻頻被絲帶繞頭又絆腳，她笑說：「我筋骨較硬，第一次玩以為好易，點知一試先知好易Kick到，直頭將自己Kick到打咗結！」多次嘗試後，她終成功以絲帶畫出優美弧線：「絲帶舞好玩同好靚，好想繼續學，學成又可以多一項才藝公開表演吓！」