鄧鉅明送樓賀二仔結婚
太子珠寶鐘錶主席鄧鉅明及太太鄧宣宏雁透露將送物業給次子鄧亦棋（Arthur）作為結婚禮物，揚言恨抱孫的鄧生，望兒子最少生三個，Arthur亦表示婚後會努力造人，鄧生大可放心！
太子珠寶鐘錶主席鄧鉅明、太太鄧宣宏雁及次子鄧亦棋（Arthur）昨日出席第35屆香港鐘錶展，Arthur透露與女友定於今年12月下旬結婚，但不願透露確實日子。問到婚後是否努力造人？他說：「會努力工作、照顧家庭。（造人呢？）都會努力。（蜜月會去邊度？）未諗。」
講明最少生三個
鄧生及鄧太被問到會否送物業作為兒子的結婚賀禮？鄧生說：「一部分啦，佢都要自己負吓責任，都知道香港第二代搵食艱難，比我哋仲難，冇咗黃金期，長輩幫到就幫。（恨抱孫？）好恨啊！（有冇催佢？）冇催，依家催就慘啦，未結婚就生出嚟好麻煩。（有冇想佢哋生幾個？）冇規定，我唔介意愈多愈好，我覺得一個家庭最好至少有五個成員，兩公婆加三個細路，加埋兩個老人家就最好。」難掩娶新抱的興奮之情！
秀文搶千語「峰」頭
另方面，藝人張秀文與吳千語昨午出席另一手錶活動，穿低胸晚裝、谷胸上陣的秀文明搶千語「峰」頭！惟擔任司儀的秀文卻否認：「唔係，各有各靚，我都好鍾意千語，佢carry好多fashion造型都好好，成日都睇佢嘅報道學襯衫。」她指晚裝是大會揀的，以華麗為主，她反而擔心做司儀上上落落不方便。千語提到男友林峯早年演出的《創世紀》正於無綫深宵時段重播，她說：「當年播放時，我都係得6歲，所以冇睇過。（你同男友年齡相差十四年，有冇出現代溝？）冇話真係代溝，有時佢講一啲歌手或者電影話題，以為我知，但其實我唔知，啲舊電影我都冇睇過。」稍後她將到北京拍電影。
文：名人組