張繼聰默認Kay有喜：全家都好開心！

張繼聰、白只、顏卓靈、萬梓良、吳家麗等前晚現身灣仔，出席新片《今晚打喪屍》煞科宴。提到正在休假的謝安琪（Kay）早前穿工人褲肚凸凸湊仔放學，被指造人成功，問阿聰老婆是否有喜？他指近日獲不少街坊送祝福，但目前沒有事宣布。問到與太太有否生B計劃？他說：「有就會迎接，我哋有plan，我都鍾意細路仔，如果真係有一定同大家公布。」

狂讚老婆健康高質素

問是否因未滿三個月而唔講得？阿聰似默認說：「唔講得就真係唔講啦！多謝祝福，我太太同家人全部都好開心，有嘢可以講就講。」對於Kay成功「增磅」而有「肚腩」，阿聰笑說：「作為老公睇唔到呢樣嘢，我老婆咁正！我都有問佢放假覺得點，佢覺得每日都好爽，又食又旅行。（暗示Kay掛住食keep得唔好？）佢好健康，都係咁上下高質素。」

白只顏卓靈想再合作

圈中情侶白只與顏卓靈於合作期間爆出戀情，問到拍攝時有否吵架？白只稱與女友多作學術性討論：「我哋增進感情唔關套戲事。（拍咗幾耐拖？）唔係好耐，仍然好新鮮。」問二人會否抗拒再次合作？顏卓靈表示不介意：「唔知會唔會再有機會，唔介意再合作。」

張繼聰攬吳家麗，唔怕返屋企被老婆扭耳仔？	謝安琪日前湊仔放學，其圓潤身形盡顯孕味。	白只表示與女友顏卓靈拍攝期間沒有鬧交。

文：影視組