惠英紅唔諗攞獎：最緊要認同我演技
影后惠英紅及陳家樂等昨晚出席電影慈善首映，小紅透露優先場反應甚佳，觀眾睇到感動落淚，獲讚演技出色的她坦言沒有想過攞獎，認為最緊要獲觀眾認同。至於首次擔正的家樂更帶同父母及女友撐場。
英皇電影《幸運是我》主角惠英紅、陳家樂聯同張繼聰、吳業坤昨晚在九展出席慈善首映，英皇老闆楊受成伉儷、容祖兒、溫碧霞、衛詩雅、泳兒、湯怡及許靖韻等撐場。楊受成慈善基金捐出30萬港元予慈善機構，關注腦退化症長者。
家樂感激嫲嫲支持
小紅及家樂受訪時直言對新片有信心，之前在中港兩地的優先場都獲讚賞，令觀眾再度珍惜親情。小紅說：「謝票見到好多人喊，有人感觸到話要返去攬吓媽咪。喺內地有觀眾話要打畀媽咪，之後仲微博Tag我話真係做咗，佢媽咪勁感動。（對獎項有冇信心？）冇諗，依家先9月，票房都唔到我擔心，最緊要人哋認同我演技。」她表示家人及同事等40人已買了戲票明天入場，並指遲些會買影碟給患腦退化症的母親觀看：「佢睇唔明（口架）喇，但照播畀佢睇。」
家樂表示今次算是自己十年以來首套擔正的電影，有叫父母及女友余香凝撐場，並笑言母親跟小紅頗為似樣。他最想叫80歲嫲嫲前來欣賞：「入行初期嫲嫲畀我好多鼓勵同資助我，學結他學戲都係佢畀錢，但佢怕醜冇嚟到。」
衛詩雅想買檳城樓
此外，衛詩雅透露今年先後拍了《鋒味江湖之決戰食神》及《聖女奇緣》兩套電影，提到跟劉心悠、張可頤、張繼聰及方力申在馬來西亞拍《聖》片，她笑言每日都像旅行狂食榴槤，很想在檳城買樓：「我有睇樓呀！環境好好面向海，屋苑又有五個泳池，平香港三分二，希望可以買到。」
文：影視組