Mr.約滿環球Alan獨立發展
樂隊Mr.的成員布志綸（Alan）、RubberBand的阿偉及香港作曲人鍾達茵昨日到電台宣傳本月公演的音樂劇，他們透露每日會有不同的天王巨星做特別嘉賓，更找來80年代的音樂班底製作主題曲《愛在那年》：「搵佢哋其實要有相對嘅製作費，但佢哋一毫子都唔收，人情味好濃！」
Alan坦言Mr.與環球唱片已正式完約，暫時會以獨立形式發展：「呢段時間我哋每個會有自己嘅發展，我都想喺音樂路上冇限制咁試吓，有時冇公司會自由啲。」問到Mr.何時合體出碟？他指做騷會合體，但創作上要視乎大家可有共識：「嚟緊我都有自己嘅音樂計劃，想做啲歌同其他人合唱。」