陳浩民頭痕學費好襟計
近日不少學校陸續開學，藝人個個忙着「趕鴨仔」返學，多仔公陳浩民直言生四個開支大，現在大女、兒子返學，一年便花近15萬元！為努力搵銀跑數，昨日陳浩民身在內地開工，由老婆蔣麗莎獨自送小朋友返學，夫妻分工湊B！
開學喇喂！不少學校經已陸續開學，昨日九龍塘名校區便有陳浩民太太蔣麗莎、陳慧琳（Kelly）及麥家琪等現身湊小朋友返學，蔣麗莎搭的士送大女陳雅薷（Elizabeth）返幼稚園，雅薷相當活潑，不時跳跳紮！蔣麗莎笑說：「剛剛在學校畫畫，我女兒投訴手很痠，因為老師叫他們畫家人，其他小朋友可以畫爸爸媽媽跟自己，她就要畫六個人！」
環保着姐姐舊衫
養四個小朋友絕非易事，身在內地的陳浩民昨日接受訪問時直言有一定壓力，但慶幸老婆幫手教小朋友，暫不用請補習：「佢對小朋友勞心勞力，而我就經濟上支持，學費每個6千蚊一個月，計埋一年7萬幾一個，我有四個，都幾襟計，但做得人爸爸就要負責任！」陳浩民早前趁未開工抽時間為今年讀K1的兒子陳璟逸訂造校服，期間又帶囝囝食雪糕，璟逸眼仔睩睩，得意到暈！陳浩民指璟逸與姐姐讀同一間幼稚園，故返學相當愉快，並表示璟逸會穿姐姐的運動衫：「因為款式一樣，環保嘛！」
麥家琪素顏呢Hea
未幾亦見麥家琪素顏現身湊女返學，抱完細女落車又回頭向車內大叫「你坐好！」疑大仔在車上，細女又想自己行入學校，令家琪有點手忙腳亂。而文頌嫻則大讚囡囡冇扭計。
文：影視組