李克勤加盟英皇轉會費夠養兩代
歌手李克勤昨日正式宣布加盟英皇娛樂，他以足夠「養兩代」的轉會費加入英皇大家庭，並以「足球論」比喻過檔英皇的原因：「踢咗英超好耐，要去西甲試一試。」他透露當初第一個就是問「校長」譚詠麟的意見，認為藝人是海鮮價，價好就要走。
為隆重歡迎「零瑕疵」歌王李克勤加盟，英皇昨日在酒店筵開10席，英皇老闆楊受成帶領英皇各高層、唱片部及經理部人員總動員出席，更安排15人的弦樂團為現場播放的克勤經典演出片段進行伴奏，活動由鄭丹瑞擔任司儀，又邀請四大傳媒代表出席，排場十足！主角克勤席上大騷唱功，演唱頭炮新歌《一個都不能少》，大會播出多位圈中好友的祝賀片段，而英皇藝人管理部總監霍汶希（Mani）為克勤送上繡有「7 HACKEN」字樣的球衣，吳雨則送巨型「紅雞蛋」，巨蛋中藏滿金蛋，寓意克勤有「生金」能力，他笑說：「你便秘咗好耐，屙多啲呢啲（金蛋）出嚟！」克勤表示：「盡力而為，盡做啦！」
不捨環球舊戰友
克勤完成發布會後受訪，提到離開合作多年的環球加盟英皇，他說：「我唔係一個鍾意轉來轉去嘅藝人，喺藝能（經理人公司藝能娛樂公司）30年，（唱片公司）環球都超過20年，要做一個咁嘅決定係非常非常難，要考慮嘅因素都好多，所以第一個問就係問校長阿倫，佢同老竇冇分別。記得嗰日我同佢踢波，踢波之前就話我有咁嘅打算，問佢有咩睇法，佢都打咗個突，佢諗咗30秒後同我講『藝人係海鮮價，如果今日有另一個球隊請你轉會畀呢個價，你走啦！』呢個答案都令我好愕然。」
克勤坦言當日回家後不斷細想，明白到阿倫是以朋友、爸爸及家人角度看待這件事，不過阿倫是藝能的老闆之一，以老闆立場，當然對他的離開百般不願意。克勤曾經問阿倫會否拍片鼓勵他並在記者會上播放，阿倫說：「私底下恭喜你啦！始終老闆身份尷尬。」所以克勤亦沒有邀請環球歌手拍片，以免令他們尷尬。而他最不捨的是一班舊戰友，尤其阿倫更是他最難過的一關，他唯一開心的是與環球和藝能都是在愉快關係下離開。
重返無綫密密做
問到現任老闆楊受成是否開出好條件邀請過檔？克勤說：「以足球員嚟比喻，踢開英超都想踢吓西甲，當然錢我唔否認係一個原因。男人始終都係家庭支柱，可以畀個仔去外國讀書，未來嘅生活都可以有好環境。（轉會費好可觀？）合理、開心啦！（合約年期？）三加二，為咗我Family都要離開發展吓，當然唔只純粹係錢嘅原因，我係成熟型男人，想有多啲挑戰，想同新合作夥伴擦出火花。」
至於他向來被喻為「無綫契仔」，問到轉會後能重返無綫，是否考慮因素之一？克勤說：「我同TVB每個朝代都有一種緣分，加盟英皇後會同無綫有好多合作，第一個會做香港小姐嘅表演嘉賓，另外亦度緊一啲唔同類型嘅節目，好似會有個《超級勁歌金曲》節目，希望做到一個真正代表香港樂壇嘅音樂節目。」
文：音樂組
攝：張福宏