陳奕迅中「不瘦降」Keep住百七磅
歌神陳奕迅昨日現身網球活動，他透露現時有打網球及羽毛球，亦有跟黃佩霞學做瑜伽，身形似乎比之前Fit，但他笑言並沒有減磅，磅數依然維持在170多磅！
歌神陳奕迅（Eason）昨日以推廣大使身份出席「賽馬會樂動網球計劃」記者會，大會播出他為活動拍攝的宣傳短片。Eason又即席示範「轉棍」動作，笑言當初因見到偶像林子祥和張學友打網球有型而學習打網球。他透露現時有打網球及羽毛球，亦有做瑜伽，認為自己「有番啲輪廓」，又指做運動已成為生活習慣。
畀人認錯係張德培！
雖然2012年左腳十字韌帶斷裂接受手術後已沒再踢波，但Eason近年與好友郭偉亮（Eric Kwok）打羽毛球，今個暑假開始再打網球，現時又有跟黃佩霞學做瑜伽。提到身形似乎比之前Fit，他笑言其實沒有減磅：「都仲係170幾磅，其實以我嘅高度，應該係150磅。」他表示愛上做運動，強身健體：「我今年42歲，其實係為身體，唔係為外形，外形自然會返嚟，係啲螺絲同骹位生銹。」他認為打網球很有型，並笑言曾被認錯做網球名將張德培：「嗰陣我短髮，梳側邊界，孭埋個球袋好似張德培，真係有人認錯我！我腳都有番咁上下粗，不過我條眉就深啲，佢之前嚟香港我都見過。」
爆康堤冇運動細胞
問到可有與女兒康堤打網球？Eason指女兒不懂打網球，又口快快踢爆女兒欠缺運動細胞：「佢運動細胞……如果公開講佢會好Hurt，佢音樂係叻啲，但個人手長腳長就論盡啲，不過阿徐（徐濠縈）有推佢跑步。」有傳康堤會去外國升學，他笑言自己都不知道此事：「佢喺香港讀，依家幾好，係好學校，佢話唔辛苦。（打算送佢去外國讀書？）如果有咁嘅能力都想，可以擴闊眼界同獨立啲，但可能中三、中四再算。」
提到好友陳子聰早前傳因肝臟問題入院，可有探望對方？他說：「冇呀，佢好似OK。（做得運動未？）未做得住，佢狀況仲要休息吓先。（出咗院未？）真係唔知，不過佢已經冇事。」
文：音樂組
攝：鄭家俊