許廷鏗操弗Body 同女神踩單車
「巨聲幫」歌手許廷鏗（Alfred）、林欣彤（Mag）及吳業坤聲靚人氣旺，愛心同樣爆棚，日前三位更齊齊支持善舉，大擺Chok Pose影「旗相」，期間Alfred透露想操弗身形，又表示想與女神踩單車，相反Mag就「唔忍口」，最Like與三五知己共聚歎美食紓壓。
許廷鏗、林欣彤最近忙錄新歌，但仍熱心回饋社群，日前二人與吳業坤齊支持東華三院賣旗日，揀選與Plastic Thing合作，以東華三院轄下社企為題而設計的三款紙旗。
Alfred自認身邊多熱愛運動的女神朋友，近日有意操弗Body的他，笑言最想與女神「踩單車郊野上」，一舉三得：「踩單車可以保持身體健康，又可以呼吸吓新鮮空氣，仲可以Keep吓Fit。」他表示有興趣參觀專做單車導賞旅遊的綠色社企，更笑說：「帶團啲人全部都好似我咁嘅後生仔，又靚仔又性感。」
Mag社企餐廳搵食
至於Mag認為人生一大樂事就是跟好友齊享美食，她說：「好想同一班朋友聚吓，食吓嘢、傾吓偈，仲可以減壓！」聚會地點她表示想幫襯僱用殘疾人士的社企餐廳，她說：「支持吓啲殘疾人士，因為每一個人都值得有個精彩人生。」而現時單身的吳業坤夢想可以跟女神玩溫馨「煮飯仔」，他充滿盼望地說：「最好親手餵埋我食啦！」問他現時的女神是否仍是周秀娜？原來他已「變心」：「我最尊敬、最愛嘅女神就係我阿媽同阿妹。」
另外，前晚Alfred在社交網玩直播，跟胡鴻鈞直闖Mag的錄音室，身穿白色貼身Tee的Mag被網民及Alfred指身材豐腴，Mag戲言：「想有雄渾聲線先要有咁上下嘅身形。」其後她才正經地為說：「因為我好乖，成日陪阿爸、阿媽去茶樓飲茶，我最鍾意食燒賣，燒賣有肥豬肉嘛！」
文：音樂組
