吳業坤恨瀡滑水梯 觀音借「褲」

前晚吳業坤（坤坤）以壓軸歌手身份演出「Slide The City Hong Kong 香港站2016」中「Sound of Hong Kong」的「我愛廣東歌」音樂會，其他演出歌手有陳柏宇、鄧小巧、應昌佑、黃劍文、組合ReVe及安俊豪等。坤坤出場時，台前數百歌迷情緒高漲，他亦大叫：「將負能量帶走。」不停互動玩得盡興。

谷「老鼠仔」晒料

坤坤未能一瀡全亞洲Slide The City最高的巨型滑水梯，有意騷後玩番轉，但他身穿不合大會規格的牛仔褲，說：「或者着平腳底褲瀡，但怕會磨喎，大髀啲毛毛比較拮，睇吓有冇人觀音借『褲』啦。」

最近坤坤忙於追睇無綫熱爆劇《城寨英雄》，直言最愛袁偉豪的角色，更突然「猛男」上身狂谷苦練了三個月的「老鼠仔」，恨由宅男變肌男。問他可有腹肌？他鍊住腰間的「士啤胎」說：「暫時只得一舊！我情迷張繼聰嘅42吋胸同八舊腹肌。（幾時變肌男？）明年夏天啦，變大隻仔為咗畀歌迷新鮮感同自我感覺良好，同追女仔無關。」

坤坤在台上落力與台下數百Fans互動。

鄧小巧對自己的身材缺乏信心。

鄧小巧中袖抗熱

同場的鄧小巧無懼高溫身穿中袖衫，她自言對身材欠信心，未敢着泳衣示人，現時體重逾140磅的她，正積極減肥，笑言如練得人魚線也不介意性感登場。另外，「Slide The City」發言人回應本地樂隊神奇膠於大前晚演出音樂會時，不滿和另一樂隊Supper Moment調出場次序外，又被cut歌及開咪催促快快演唱，發言人指是誤會：「其實係音響師催台上插咪嘅同事快手。（有人『搭錯線』？）係，催都係催插咪嗰啲啦。」至於調出場次序及cut歌，發言人指做live show時有類似情況發生：「個Show已超時，一定要11時前『收聲』，呢度唔係超時罰錢就得，佢哋冇嚟綵排，對大會嚟講係好『大鑊』嘅事。」

文：音樂組

攝：鄭家俊