許冠傑殺落尖沙咀 唱歌撩女仔

「歌神」許冠傑（Sam）昨日在紅館外乘坐開篷巴士落尖沙咀宣傳10月紅館演唱會，獲何傲兒、主辦單位負責人林建名、兩子許懷欣及許懷谷等到場支持。Sam甫出場即獲歌迷包圍。開篷巴士出發駛去海防道，沿途Sam都有跟途人打招呼，又唱出《尖沙咀Susie》、《浪子心聲》等經典歌，見到女仔時更唱《Pretty Woman》。當開篷巴士停泊在海防道，Sam即場獻唱多首金曲，例如《最緊要好玩》、《半斤八兩》、《難忘你》等，瞬間吸引逾百歌迷及途人蜂擁而至，場面墟冚。原本大會安排Sam落車派發紀念品，但因人多故取消環節。之後Sam在車上派發簽名扇給途人，即惹來過百人爭相搶奪，最後他們僅逗留約20分鐘便離開。

何傲兒穿窿褲養眼

何傲兒穿熱褲晒長腿力撐歌神，熱褲側邊更有3個窿，非常養眼。當她跟經理人公司老闆林建名合照時，對方即(目及)其穿窿褲，何傲兒即用手遮窿窿，場面搞笑。

何傲兒的熱褲側邊有三個窿，非常養眼。	林建名（目及）何傲兒的「穿窿褲」。	許懷欣（左）、許懷谷與父親落力宣傳。

唔怕熱 最緊要好玩

另外，Sam出發前接受訪問，他表示今次首次落區宣傳，想搜集民意，調查大家想他在演唱會唱甚麼歌。他說：「未坐過呢時行樂(o架)巴士，好恨去上面玩。」身穿長衫長褲的他坦言不怕熱：「最緊要好玩！（鍾意同歌迷近距離接觸？）係，所以今日好enjoy。（怕多人混亂？）唔緊要。（頭先好似有fans錫你？）係呀。（唔怕？）唔緊要，習慣咗。」問到怕不怕遇瘋狂粉絲？他稱：「見招拆招。（試過最瘋狂係點？）60年代唱歌有好多書院女生會抆我隻腳拉我落台，好瘋狂，所以咀都係小兒科。」問他屆時可會騷腹肌？他笑言：「可能會。（依家有幾多舊？）暫時4舊。」

文：音樂組