何芓諄創業被騙 一步一驚心
前澳門特首何厚鏵千金何芓諄（Charmaine）不靠父蔭，熱愛藝術設計的她憑打工得來的五位數美金積蓄，於25歲時在美國創業成立手袋品牌，可惜卻慘被人呃錢，向來獨立的她自此經一事，長一智。
30歲的何芓諄（Charmaine）是前澳門特首何厚鏵千金，在港出世的Charmaine於澳門成長，11歲與哥哥到外國讀寄宿學校，坦言當年離家初時嚮往沒有父母監管的自由生活，後來才深深體會「在家千日好，出門半朝難」的道理：「初時覺得好有冒險感，去到先識後悔，乜都要靠自己，學同roommate相處，但讀寄宿係好嘅，學識自己處理同解決問題。」遊歷過意大利、巴黎等地後，Charmaine在紐約居住十年並畢業於孕育不少著名設計師，如Jason Wu及Alexander Wang的Parsons設計學院。
獨立應對冤枉路
Charmaine約25歲在美國創立手袋品牌Me Char，資金是她在美國電視台及時裝品牌打工儲來的積蓄，不靠父蔭，由五位數美金開始，當中遇到不少困難，令她最深刻的卻是被騙：「美國開品牌好大競爭，畀人呃同行咗好多冤枉路，學識人哋畀支票你，要第一時間入咗佢。有次寄貨出去，收到支票後佢話有問題，叫我寄番去，但之後就再收唔到支票，冇貨又冇錢，喺開業初期，雖然好少錢，但係一個教訓。」
闖入內地增客源
Charmaine去年在港開了pop up store，今年又在尖沙咀開設首間專門店，更進軍內地的網上生意，看似生意已上軌道，但她坦言仍屬創業階段：「客路係比以前多，有新挑戰。我哋new brand冇資格講上軌道，係一個階段性，行錯會傷到自己，我仲有好長嘅路先叫上軌道。品牌每年都會出兩季主題，而新一個Bespoke系列就以嘴唇為設計圖案，象徵每一個人的性格，憑把口表達自己嘅思維。品牌亦首次推出牛仔布設計同背包款，中性設計兼顧男性客人。」
身為名人之後，她坦言回港後多了一個光環，相對壓力也增加：「返香港就多人識，對品牌宣傳有幫助，不過有好處亦有難題，期望高，對自己有要求。」她直言父母好開通，不用她參與家族生意：「因為有哥哥，冇話唔畀我做任何嘢，佢哋想我唔使做得咁辛苦，唔好有咁多壓力，但多數壓力都係自己畀自己，我嘅生意佢哋好少畀意見，但心靈上佢哋係支持。」