馬國明口技了得翠如先發制人
藝人馬國明、黃翠如、黃心穎、岑麗香、楊秀惠及梁烈唯等，昨日到馬鞍山宣傳劇集《為食神探》又與觀眾合照，場面熱鬧。眾人大玩遊戲以口叼住餅乾條傳送芝士圈，馬國明與香香默契十足，馬國明更獲讚「口技了得」！相反另一組的唯唯出茅招，玩玩吓整跌餅乾條，直接以口含住芝士圈再傳畀其他演員，企唯唯上方的心穎不停辛苦忍笑。至於翠如則搶住負責第一棒，只需傳給心穎，避過與男演員互動。至於幾位女神玩有口難言遊戲時，就含住「奶嘴糖」拍照，畫面爆趣。
滯留北京懶理男友
翠如日前與男友蕭正楠（Edwin）等人到北京宣傳，透露撞正航班延誤而滯留機場：「真正喺北京得兩個鐘，飛機就Delay咗四、五個鐘。（可以同Edwin相處耐啲！）全程幾乎冇乜傾偈，Edwin等嘅時候狂瞓，到我上機就瞓，大家都太攰。」提到有份拍攝新劇《使徒行者2》，翠如表示約十月底開工，將與周柏豪及袁偉豪有感情線。她坦言最期待與宣萱合作：「一向好鍾意佢，大家都讚佢好nice，所以更加期待。」
寧缺勿濫唔拍散拖
至於近日以1,960萬元購入太古城千多呎單位的馬國明，被問何時成家立室？他笑言：「隨緣啦！（買樓準備好結婚？）事業未有喎，而且未撞到，如果只係揀女友，要求可能唔使咁高，但又唔想拍散拖。（鑽石筍盤？）好多人筍過我。（冇多咗女仔埋身？）冇喎，冇時間蒲，要開工！」
文：影視組