陳嘉莉Fight低柔弱打到嘔

早前的ViuTV節目《G-1格鬥會》雖然負面新聞不絕，但勝在收視點擊高，柔弱女子打上擂台，有肉有血又有淚，輕易成為話題作，連帶參賽女藝人知名度亦急升！模特兒陳嘉莉（Kelly）亦即將與前港姐沈頴婷、鍾溥敏及主播李依雯一同參加四人女星搏擊真人騷淘汰賽，四女會先分成二人一組，之後再單對單決賽。

狠招抗色狼

近日Kelly為比賽積極備戰練拳，每周跟師傅練拳四日，每日三小時，別以為她外表柔弱容易「揸流攤」，現場見她出招相當狼死，拳拳到肉，絕對有姿勢有實際！

Kelly為比賽積極備戰，每日都勁多汗！	打完拳Kelly換上連身裙，女人味出晒嚟！	Kelly熟手地纏上繃帶。

她說：「啱啱開始時好辛苦，成日打到想嘔，打咗一排就適應。（依家好打過男仔？）可以切磋吓啦，哈哈！（出街唔怕色狼？）都唔係嘅，不過起碼依家學識點樣用力，如果真係畀人突襲會識得走位，有反抗能力。（想轉做打女？）想呀！不過最重要係練好體力先，控制體重都好緊要，因為依家運動量大，要食好多嘢嚟用力，所以臨近比賽時要減少少磅。」

流汗「消」腩仔

Kelly指打拳是全身運動，會流很多汗，故有收身作用，問打拳後是否清減不少？她笑說：「有瘦到呀，最明顯係冇咗肚腩，依家最想練腹肌，希望可以有『朱古力』。」

採訪：Ada Lam

攝影：張福宏

場地：榮拳館