Supper Moment裸瀡大解放

Supper Moment壓軸出場，氣氛熱烈。

樂隊Supper Moment（SM）、sp'ACE、羅啟聰（Kris）與樂隊InSpring等，前晚演出「Slide the City」中「Sound of Hong Kong」的「Band Night」音樂會。壓軸出場的SM極速炒熱氣氛，當晚適逢是主音Sunny生日，數十名粉絲為他獻唱生日歌。去年玩過這條滑水梯的四子笑言成員阿雞原先想在演出前玩一次：「但我哋制止咗佢，怕佢濕晒彈結他會漏電。」問到四子會否着泳褲玩？他們笑說：「唔着囉，要着泳褲嘅咩？我以為香港興唔着添，呢啲叫裸瀡！」SM將於11月在會展開騷，問他們可會為個唱操肌？他們笑說：「我哋由第一張唱片已經操緊，睇唔出咩？」

sp'ACE玩人形蜈蚣

樂隊sp'ACE四缺一，成員鍾健威被爆陪女友黃美棋慶生而請假，兩日前他們來這裏玩過滑水梯：「我哋玩嘅時候仲有拍片，一前一後咁拍，人形蜈蚣方式瀡最好玩，速度感好強，但好安全。」

羅啟聰（右二）與InSpring落力演出。	spACE	趙珮榕

同場的Kris左腳和右眼受傷，未能暢玩滑水梯：「之前kick到石壆，撻咗落地撞親隻腳，隻眼入咗沙石紅咗，半年唔戴得con（隱形眼鏡），但騷我照做。」他又自爆試過演出時撻親：「可能我太投入，最傷一次係中學嘅時候喺樓梯跌斷手。」

文：音樂組