Fans撐攞視后 「刁蘭」爆喊

全城熱捧的無綫劇集《城寨英雄》，收視、口碑俱佳，肉緊劇情更成為網上熱話，劇中角色「花曼」、「龍成虎」等一個一個死去，催淚之餘更令觀眾看得欲罷不能！而一眾演員更約埋今晚齊齊食飯兼收看大結局！視后胡定欣昨日率先與近百粉絲舉行派對，預祝9月9日生日之餘，順便慶祝有望憑「刁蘭」一角蟬聯視后，獲好友林夏薇和老公到賀。

感激觀眾好評

定欣透露生日會多了不少新面孔，亦收到驚喜：「我入場時，佢哋一路送花、一路唱咗容祖兒嘅《be true》畀我聽，首歌好代表我哋，大家經歷好多，一開始就整喊咗我。」問Fans對她今年再奪視后是否很大期望？她說：「佢哋冇畀壓力我，係一種支持，聽晚大結局，佢哋都話好唔捨得個劇完。（你自己呢？）我冇壓力，要做嘅做咗，今次拍《城寨》係好好嘅經驗同大挑戰，觀眾畀我嘅評價已經好滿足！」

（花曼）王君馨	（刁蘭）胡定欣	（拳佬）陳展鵬

網民缽仔糕掟「楊竹鑾」

此外，之前外間有不少劇透及劇情揣測，昨日問到劇中主角胡定欣（刁蘭）、陳展鵬（拳佬）、袁偉豪（牙佬）、王君馨（花曼）、劉佩玥（柯德莉）及監製文偉鴻時，眾人齊齊掩口「封嘴」，究竟柯德莉會否遭其親生父親「楊竹鑾」（歐瑞偉飾）殺死？拳佬與刁蘭會齊齊死掉抑或大團圓結局？刁蘭會否犧牲自己與楊竹鑾攬住一齊死？而最好打的楊竹鑾的死穴又是甚麼？全都是觀眾期待的劇情！不過其實無論如何，網民早已對楊竹鑾恨之入骨，更有人留言：「呢幾日行街見到缽仔糕就扯火！（楊竹鑾於劇中賣缽仔糕）」更有人指想用缽仔糕掟死他！

Fans在生日P送上驚喜，定欣感動到喊！

林夏薇（左）向定欣送上士多啤梨蛋糕，夠晒姊妹！

文：影視組