陶枳樽擇偶鍾情肚腩仔

夏日盛事「Slide The City Hong Kong香港站2016」正在中環海濱活動空間舉行，吸引一班藝人支持，其中陶枳樽（Crz）也是捧場客，昨日她身穿性感bikini top配短褲，在場內盡情玩樂，除了必玩的瀡滑梯外，她也去了人造沙灘、水彈迷宮及泡泡池大玩特玩，玩得相當開心！她大讚滑梯刺激：「冇乜離心力，但瀡落嚟好有速度感，咩年齡都啱玩！」她又讚泡泡池好玩：「啲泡玩完好易沖水，同埋啲泡好夢幻少女，啱晒我！」

戴超望猛男

Crz表示很愛水上活動，入行前差不多每星期都去沙灘或泳池：「但自從畀人話咗幾年外傭後，依家少咗曬太陽，但都會等陰啲嘅時候游。」講到玩水上活動有很多大隻猛男，問她可會乘機(目及)仔？她即怕醜謂：「如果有當然會望吓，不過我好少特登望實人，因為我都唔鍾意畀人望實。（戴超咪可以盡情望？）呢個方法都幾好！」

穿上比堅尼Top的陶枳樽在泡泡池玩到成身泡。

陶枳樽挑戰瀡滑水梯，大呼過癮。

問她揀男友可希望對方是陽光壯男？Crz表示想，但又擔心他們易花心：「都知大隻猛男通常都係playboy，啲人話佢哋練大隻唔係淨係為一個女仔，係為好多女仔。我寧願揀有少少肚腩嘅，因為有安全感。」

今晚BandRock爆

為支持本地音樂，活動由前晚開始一連5晚舉行不同主題的「Sound of Hong Kong」音樂會，今晚第三晚以「Local Band Sound本地樂隊」為題，請來9個表演單位演出，包括Supper Moment（SM）、Nowhere Boys、sp'ACE、雞蛋蒸肉餅、神奇膠等，壓軸出場的SM將演唱《一樣不一樣》及《風箏》等四首歌，定必high爆全場！

文：音樂組

攝：劉斌