跟口叫黃父爹哋吳業坤博同心穎一家親
被封「偽毒男」的吳業坤昨日與藝人黃心穎出席周大福活動，心穎家姐黃心美擔任活動司儀。心穎表示爸爸和另一家姐「快閃」撐場，她踢爆坤坤竟跟她口叫「Daddy」，還想影「全家福」。問坤坤是否想追心穎，他即謂「未夠班」。
吳業坤和黃心穎為周大福的金飾活動做嘉賓，問到心穎可會即場買金器？她笑言：「係都叫爸爸買啦，講笑啫，自己賺錢自己買。」並表示當年收第一隻鑽戒便是爸爸送給她的大學畢業禮物，自此愛上鑽石。問到以前男友有否送過鑽石？心穎說：「鑽石就冇收過，頸鏈都有。（分手有冇問番你攞？）如果真係咁，我實畀番佢！」心穎即向身旁的坤坤說千萬不要學，坤坤笑言：「唔會，因為我唔會買，我意思係唔會買畀心穎。」不過，坤坤稱小時買過情侶鏈：「嗰時要慳錢，飲嘢都唔敢叫凍飲。」
讚女神「正囉」
然而最抵死是心穎玩踢爆，指活動開始前她與父親及兩位家姐影相，坤坤竟問：「使唔使一齊影全家福」，心穎笑說：「佢（吳業坤）又跟我叫『Daddy』同『家姐』，嚇到我吖！」坤坤即急急解釋：「係想幫你哋揸機影相， 因為成日網上見到你同屋企人嘅相好sweet。（你做乜咁關注心穎？）佢正囉！（仲叫埋Daddy、家姐，係咪想追人？）只可工作，不可交心，因我未夠班。」
尷尬到流汗
問心穎覺得坤坤如何？心穎笑言：「幾好，筍盤嚟！」心穎大坤坤一歲，問可介意姊弟戀？心穎爽快說：「OK，溝通到就得！」對於溝通問題，坤坤指需要多些工作接觸才可，說畢見坤坤一臉尷尬流汗，更要紙巾抹眼鏡似擔心又現「霧化奇境」。而心美、心穎兩姊妹更主動出擊，左右夾攻翹着坤坤手臂影合照。
文：音樂組
攝：林蔚恩