黃翠如靠惡食住阮兆祥
藝人黃翠如在無綫新劇《為食神探》化身男人婆，不時與人鬥車，又為義氣代朋友與人鬥食辣椒，因而鬧出不少笑話！對於監製封她為鄭裕玲接班人，翠如表示自愧不如，不諱言一直崇拜鄭裕玲，拍攝前更特地狂煲她的經典作品，學習她拿捏角色的節奏。
全套20集的無綫新劇《為食神探》將於本月29日晚上9時30分首播，這個私家偵探故事講述江欣燕經營一間生意欠奉的偵探社，與老公鄭子誠離婚後被分一半身家，鄭子誠更帶住一班性感女另起爐灶，與她打對台，幸而獲電腦奇才弟弟（馬國明飾）協助打理偵探社。一次偶然機會下，馬國明為岑麗香解決難題，因而成為情侶，加上與他不打不相識的貨車司機（黃翠如飾），組成新一代偵探Team，透過查案引發不少笑話。
監製睇好接DoDo棒
平日嬌滴滴的翠如，今次搖身一變成為粗魯的貨車司機，除了與阮兆祥鍊車外，心口掛住個「勇」字的她，為朋友出頭更不惜與人鬥食辣椒！監製梁材遠大讚翠如在該場戲表現不俗，他說：「場戲好有喜劇感，半卡通半誇張，我哋連辣椒都有分辣嘅等級。翠如都好鍾意場戲，佢做得幾好，聰明又醒目，爆到火花，又有主持Talent，我成日同佢講，努力啲就可以去到鄭裕玲（DoDo）級數，我覺得佢係接班人o架！」
見識劉江「威力」
對於被監製笠高帽，翠如接受電話訪問時笑不攏嘴，並表示自愧不如：「真係受寵若驚！我好鍾意Do姐，拍之前都睇過佢嘅電影《表姐，你好嘢！》幾次，學佢演戲嘅節奏。」戲中與搞笑高手阮兆祥有感情線，翠如表示拍攝時尚算應付到：「佢同馬國明成日爆肚，只要跟住佢做就OK，我仲要成日兇佢添！」而劇中與劉江的一段父女情，翠如表示終見識到對方的威力：「角色講我同爸爸關係極差，成日詛咒佢，我從未試過咁毒，印象最深係一場同劉老師嘅感情戲，事前佢話唔使排，話到時就會做到，結果佢一句『對唔住』再加埋表情，令全場人都好感動，果然係高手！」
文：影視組